陳胤台語詩聲

＜聽候＞----哀念泰雅先知樂信瓦旦咱知，秋風一直teh等，等一个聲嗽等露水反白，等月娘變圓，等你故鄉彼條溫柔ê溪行入心肝底阮ê毋甘定著千言萬語無疑悟，一下擔頭suah講無半句話天神，無聲無說......我順你ê目神向遠遠看過去，你故鄉彼條媠媠ê溪毋知猶會記得無祖靈ê名kah記持ê疼咱知，咱定著知歷史ê空喙，好bē離到今，猶流血流滴tī你ê胸坎仔內流轉去故鄉，彼條妖嬌、迷人ê溪你ê慈悲，你ê智慧你ê寂寞，你ê愛敢猶有人知？泰雅這兩字愛按怎寫才有好將來......彼粒號做公義ê銃子mā無聲無說。我順你ê目神向遠遠，遠遠看過去天頂，有一座彩虹做ê橋tī風裡，飄搖祖靈，teh擛手敢若一杯，唌人喙舌足芳，足芳ê米酒咱知，彼是秋天稀微ê秋天，一直teh等teh等，等天地拋荒等歲月變老，等神kah鬼，做伙吼......#光景147樂信瓦旦（Losing Watan 1899-1954）：Lo̍k-sìn Uá-tàn，泰雅族大豹社人，漢名林瑞昌，日名渡井三郎、日野三郎，醫師、民代、原民運動者，終生致力提升泰雅族人與原住民族的生活和地位，1954年4月17日，與鄒族領袖高一生等原民菁英遭中華民國的中國國民黨政府以‘’匪諜‘’羅織罪名，處決於新店安坑刑場。空喙：khang-tshuì，傷口。擔頭：tann-thâu，抬頭。擛手：ia̍t-tshiú，招手。唌：siânn，吸引。（2024/9/20）#詩聲筆記<唸讀>寒人誠寒。彼年春天，定著彼寒人koh較寒。1954年4月17。這工，是哀傷ê一工。咱台灣ê原住民，定著愛會記得這工。這工，樂信.瓦旦和鄒族ê高一生，kah其他4个頭人，hōo人安一个「共匪」罪名，做伙tī新店安坑刑場銃殺。殺人兇手是中國國民黨政府。見擺讀著這段歷史，就目箍澹。毋但in，koh有濟濟ê原民受難者。遮个原住民菁英，彼陣若無死，歷史定著會改寫。極加悲哀ê是，彼時講人通匪ê，這馬家己leh通匪。Koh較悲哀ê是，大多數原民ê選票，到今猶攏頓hōo這个萬惡罪魁。咱無責備原民，顛倒是毋甘。黨國時代洗腦教育ê敗害，揜貼ê原鄉，消息欠靈通，較無法度走閃。洗kah齊齊齊。這馬中國黨，規捾kap做伙，攻占國會；將來不幸若hōo共產黨統治，悲劇重演，定著走bē去……其實悲劇一直leh輪迴。才號做歷史。2024年秋天，去樂信瓦旦ê部落行踏，新北三角湧、桃園腳板山踅一飛，這款感觸愈深刻。行踏轉來，寫一首詩記念伊，一直無彼个氣力好唸讀；透早，天誠gàn，想講kā提出來唸看覓仔leh，無疑悟，愈寒。毋過，咱leh想，上無天頂ê樂信，定著會加淡薄仔溫暖。按呢，寒mā甘願。（2026/1/8/詩聲筆記）Powered by Firstory Hosting

＜搬徙＞終其尾聽候一葉落葉落落塗跤化做塗肉彼片恬靜ê曠闊自自然然眾生，迷人ê歌落雨ah寒人，未反寒幸福，敢若慢慢仔leh黃有風聲水，流ê聲時間，搬徙ê影一目nih仔彼个瞬間就是永遠......Gâu早！來作穡ah好好仔流汗#有影41徙：suá，移動。nih：眨眼。作穡：tsò-sit，工作。（2025/11/11）#詩聲筆記＜生死＞有生就有死，這个宿命，無人會當走閃。眾生萬物，攏相仝；雖罔有一寡物件，比如石頭，咱人kā界定做無性命之物，斟酌想，敢誠實按呢生？明明知影流感敢若未好離，昨昏去行山，koh偷啉一杯咖啡。毋過無試毋知。唉！爽了後，昨暝suah塞鼻塞kah睏bē去，胸坎tsa̍t-tsa̍t，suh無空氣，艱苦kah強beh往生去。自十月初8著災到今，beh滿5禮拜ah，這站身體未穩定，三不五時會去搪著這款艱苦代。逐擺，都感覺死，若像足近足近......我敢準備好ah？毋知。Kan-na知，艱苦愛緊想辦法解決。有歲ah，其實無足驚惶ê，逐步試看覓，尾仔去灶跤斟一杯燒滾水，勻勻仔tsi̍p罔哈，總算通ah，胸坎仔mā較四序；緊偷偷仔sô來睏，騙過死神ê目睭，真正忝kah睏去ah。半暝按呢舞一兩點鐘，敢若tī陰槽地府遊山玩水。睏無偌久，起來放一pû尿koh sô轉去睏，終其尾天光ah。猶活leh。心肝頭是誠平靜。去灶跤，啉一杯滾水，早頓擲入去電鍋炊。Saù來，去冊房拍開窗仔，做操伸勻，叫醒新ê一工。寒人，聽講風颱beh koh來ah。痟kah有賰；世間。（2025/11/11/詩聲筆記）Powered by Firstory Hosting

＜老樹＞老khok-khok矣老kah出汁彼毋是雨，是目屎歡喜，無底代悲傷，無底代時間ê面模自本按呢生樹跤，有飄撇ê影綿綿ê話語，纓纏勻勻仔，湠出往過，恬靜ê聲嗽其實，風裡是非善惡，到今猶leh相諍歷史，足吵#聲嗽88纓纏：inn-tînn，纏繞。相諍：sio-tsènn，爭辯。（2025/5/19）#詩聲筆記<行過>這欉榕仔，規百歲有ah。喙鬚糊糊糊，若坐tī樹跤哈茶、破豆，不管時，就敢若春風微微。遮，是蒜頭糖廠。糖廠，無leh做糖ah，轉型做糖業文化園區，成做觀光ê所在。台糖遮ê老糖廠，齊是面大地頭闊，一寡舊宿舍、廠房，建築攏帶有時代ê特色，誠價值又koh影目；koh一个上溫暖ê味，就是老樹滿滿是，咱若來遮散步，就若像聽時間leh講古，幸福飽滇。蒜頭，這个地號名，拄聽蓋心適又koh親切，想講六跤在地定著出產蒜頭，結果毋是。遮並無種蒜頭，原字詞是，算頭──庄裡好額人較濟ê所在。唉，咱知，這是殖民語言ê粗魯kah壓霸，kā咱喙舌烏白鉸。六跤，mā是按呢生；是六家，毋是六肢跤，極加毋是六腳。毋過，咱台灣人，敢若攏無要無緊。彼工，我第二擺來，是熱人六月，天氣是熱kah剝皮；恬靜，koh行過伊身邊，伊毋知猶認得我無？若親像有話講bē出喙。──2025/11/9/詩聲筆記Powered by Firstory Hosting

＜春天雺霧未散＞－－記念高一生啥人tī遐leh唱歌招呼春天揜貼ê樹林有風微微美麗ê天神啊！啥人tī遐leh唱歌櫻花，早就落塗彼年ê雨水猶含tī目箍敢若春天tī遐leh唱歌阿里山，雺霧未散雲頂，刻骨ê記持煞起畏寒美麗ê天神啊！我綴春天leh唱歌相思，一時毋知撙節心肝窟仔隨做大水哀傷嘛毋知beh漂浪去佗位？只好，化做一首詩流入去祖靈ê墓壙聽候明年櫻花開ê時成做新ê春天Hōo天頂ê你......#柳河咖啡詩屋#高一生（Uong'e Yatauyungana，1908-1954）：Ko It-sing，台灣鄒族政治家、教育家、音樂家、詩人，致力於原住民自治運動，二二八事件後遭逮捕；1954年4月17日遇害。獄中思念妻子（春子）之作＜春之佐保姬＞，感人肺腑。#毋通放袂記得揜貼：iap-thiap，隱密。撙節：tsún-tsat，節制。墓壙：bōng-khòng，墓穴。（2022/04/17）#詩聲筆記<微微仔光>這幾工咧整理一寡白殕ê心情。前年7月，去阿里山行踏，走揣一寡高一生ê跤跡。出發進前，kā寫hōo伊ê詩錄音，想講若有因緣kah in後生高英傑見面，無機會唸讀，就會使hōo伊錄音檔。這是我虔誠ê致意。誠好運，訪談煞猶有淡薄仔時間，當面唸讀hōo伊聽；一粒願望，圓滿。舊年，4月17，高一生受難日，我專工去新店安坑刑場遺址哀念。行轉來ê時，tī一个社區小公園歇跤，手機仔拍開，無疑悟FB跳出高英傑ê文，伊當leh用一條歌數念in老爸。遮拄好，因緣koh一擺交插，這，毋是哀傷niâ，是講bē出喙ê溫暖。咱人就是靠這款溫暖繼續活落去。若有情，生份人就毋是生份人；一港微微仔光，tī時間裡牽絲纓纏，寒人ê日子，mā燒烙起來。In ê苦難就是咱ê苦難，攑一支雨傘替咱遮悲傷ê雨。Tī遠遠ê路途。記持，永遠寫tī茫茫渺渺ê時間裡……咱感恩，毋甘。──2026/1/10Powered by Firstory Hosting

＜啄樹鳥＞Kā上帝挵門若親像千萬年矣無人應聲這，定著一款責罰石頭，研過ê疼捒上山隨koh輾落來規身重汗，仝款疼一直挵，一直挵誠綿爛，樹仔直直大日頭，煞無看影#台語光批3-6捒：sak，推。研：gián，碾壓。輾：liàn，滾落。（2024/5/11）Powered by Firstory Hosting