陳胤台語詩聲

＜雲＞目神，一蕊一蕊慢慢仔kā黏做伙成做迷人ê話語風ê心意是啥阮就講啥，管待伊是圓抑是扁橫直你聽無bē掛意，咱人三生七世，只不過天ê一目nih仔一分一秒直直瞭過阮猶原發春天ê穎開家己ê花Beh憂愁mā bē赴市你敢知紲來風beh按怎吹......#有影84一目nih仔：一眨眼。瞭：lió，瞄。（2026/1/30）#詩聲筆記＜魂＞咱若不時擔頭看就知，逐工ê雲攏無相siāng，逐蕊ê形mā無仝。其實毋但逐工，時時刻刻攏leh變化，目一nih又koh是新ê面模。親像咱人，當你智覺著家己猶活leh ê時，彼个你已經過往去ah。百果山這个小山崙，寒人我捷來，來遮罔坐罔曝日罔啉茶，罔散步。細漢時，遮誠衝，這馬，無幾隻貓，小可淒涼。世事無常，無人會當按算得。平常時仔，根本無遊客，kan-na一寡老人來遮罔晃罔踅神，這款聲嗽，拄好合我ê味。有歲ah，日子就變簡單，一片雲，就會當度leh規晡ê時間。彼工，雲尪誠特別，害我相kah流目油，毋是感動啥，哈，定著是手機仔病又koh giâ起來ah。偷偷仔kā你講，我來遮，主要是神社ê緣故。按呢虔誠行一逝古參道，就感覺有得著祝福，彼款落落無底深坑hông 承著ê滋味，就算家己戇想譀想糝想，mā好。渡日子以外，咱人定著愛不時想寡齣頭來渡家己。家己，敢若雲仝款彼lō輕蠓蠓ê魂魄......（2926/2/2/詩聲筆記）Powered by Firstory Hosting

＜影＞看路kā寂寞彎彎斡斡，恬靜寫入去山ê胸坎仔山，無應聲愣愣看我坐kah賰一片薄薄ê影寒人beh暗仔掖tī塗跤ê日頭光有風聲風聲你蹛tī山ê彼搭敢有影......#有影82斡：uat，轉彎。掖：iā，灑落。蹛：tuà，住。（2026/1/28）#詩聲筆記＜半路站＞最近，定定來遮行路練跤，來回量約仔3 khí-looh，路平有樹蔭，算誠四序。跤以外，其實是beh練心。身kah心合一，號做修行。彼工，tī我踅頭ê半路站歇跤，媠媠ê日花拄好開tī我ê身軀，一寡仔貼tī塗跤，迷人ê影，拉圇燒，安搭憂悶心情，正著時。遮平常時，透早運動ê人濟，下晡較無人；我若tī厝守規工，攏趁暗頭仔人少來行踏。熱人，就無仝ê景緻ah。半路站路邊有五、六粒石頭，我就坐tī遐，看人、hōo人看，啉茶曝心事，差不多歇一、二十分才翻頭。無人ê時，就看樹影，看家己ê影。心恬靜，世間ê萬項代，就bē遐鑿目。走精去ê節奏，逐工揣寡時間koh kā撨倒轉來。看影看kah踅神，suah雄雄起憢疑，路若無人行，伊毋知會寂寞無？哈，咱知，覕tī心內ê詩，當beh起童ah......（2026/1/31/詩聲筆記）Powered by Firstory Hosting

＜咖啡＞迷人ê目神飛來ê時，就kōo詩小kā案內一下紲來，激做酒成做愛情寬寬仔sip勻勻仔落喉一直到海水焦，石頭爛天地變老#有影77案內：àn-nāi，招待。語源，日語。kōo：用。sip：淺酌。（2026/1/23）#詩聲筆記＜愛情＞愛情是啥？定著無人講會定著。有人講彼是一種病；毋過，掠準人ê幸福是一款幻影，伊是上倚近幸福ê幸福。咱mā知，愛情kah婚姻無必然ê關係，毋過定著愛有一个伴，愛情才會當降生；靈魂kah身肉交纏透濫，才是愛情ê真面目。不而過，彼款透濫較按怎bā，mā無可能100pha，pha數決定愛情ê品質，是的確ê。Kan-na靈魂ê愛，號做柏拉圖；若是kan-na肉體，號做禽獸。準做愛情正港是一種病，你敢有才調刁工破病？咱可能kan-na會使痟想，抑是去營造致病ê環境，比論，去加和人交陪盤撋。毋過，有人舞規世人，mā是規欉好好，無病無疼；有人不時leh破病，隨病隨好；應該有愈濟人，敢若有病又koh無病，淺眠koh礙虐。敢有人一直leh破病病bē煞，若有，伊一定是神仙。毋驚你笑，我自少年起tshio，就leh想這个問題。目一nih，老硞硞ah，猶leh想；mā是bē澈、bē悟。這款譀想，定著mā是病，症頭凡勢比愛情本身koh較嚴重。有人講，無愛情ê婚姻是地獄。我無結婚過，詳細毋知；毋過會當理解。獨身，雖罔無伴，猶會當去愛家己、愛全世界ê哩哩khok-khok；因為自由，有自由就會當去追逐愛情，永遠有一粒戀夢佇leh。當然，婚姻愛情攏有，使人掀羨，毋過咱台灣人ê婚姻觀念，常在縛兩粒石頭──雙方家族，若歹剃頭，愛情就會直直退色……哈，愈想愈茫愈霧。是講，愛情是啥？敢mā是幻影？這題足難，先掀過，咖啡罔啉啦！──2026/1/29Powered by Firstory Hosting

＜搜揣＞強beh kā厝反過mā是揣無彼本冊彼粒心肝毋知藏tī佗？綿爛，今仔日號做腰痠背痛記持，是啥？年久月深一片坱埃恬靜落leh塗跤，抑是冊偷偷仔peh轉去山崙發穎生做一欉樹仔......#有影79搜揣：tshiau-tshuē，翻找。坱埃：ing-ia，塵埃。發穎：puh-ínn，發芽。（2026/1/25）#詩聲筆記＜安搭＞今仔日上衝ê，是蜘蛛人Alex，伊空手khàng起lih台北101。這定著是弄險、耍命；愛人噗仔聲以外，我leh想，beh醫治家己不安ê靈魂占較大面。其實，咱人逐工mā攏leh弄險耍命，只是跋大跋細niâ。跋大無一定輸，跋細mā無包贏。進前看一个報導，有人並leh欄杆beh hip相，結果柴漚suah倒去，不幸摔死；遐才幾米懸niâ，頭khok著，一命嗚呼哀哉。知毋知，有準備無準備，才是關鍵。親像阿共仔beh食台灣，上大ê危機是，咱毋知抑是毋相信有一陣內奸leh和in鬥空仔。若有意識有準備，beh戰，in無包贏。敢毋是？彼工beh提一本冊送人，suah發見廚仔焦ah；就去倉庫beh補貨，結果揣無。昨昏雄雄koh想著這層代誌，開始齷齪不安，就一直搜一直揣；冊重，規箱規捆搬上搬落，跤手kah腰，小可去giú著；有歲ah，無智覺，這就是弄險耍命。佳哉，是小可仔。落尾mā一直搜一直搬；毋過知影細膩ah。哈，冊山，是我ê 101。結果，mā是搜無。上無猶有二三十本，敢家己會生跤？歹戲koh拖mā毋是頭路，所致，透早就寫一首詩，來kā看破，等伊另工家己sô出來。挑戰，Alex成功，我失敗。阮ê命仝款攏猶老神在在，靈魂不安mā有四序安搭。代誌無仝，心路相siāng。伊有噗仔聲，我無。我bē夯醋桶；無，簡單，我就kā家己拍噗仔。（2026/1/25）Powered by Firstory Hosting

＜聽候＞----哀念泰雅先知樂信瓦旦咱知，秋風一直teh等，等一个聲嗽等露水反白，等月娘變圓，等你故鄉彼條溫柔ê溪行入心肝底阮ê毋甘定著千言萬語無疑悟，一下擔頭suah講無半句話天神，無聲無說......我順你ê目神向遠遠看過去，你故鄉彼條媠媠ê溪毋知猶會記得無祖靈ê名kah記持ê疼咱知，咱定著知歷史ê空喙，好bē離到今，猶流血流滴tī你ê胸坎仔內流轉去故鄉，彼條妖嬌、迷人ê溪你ê慈悲，你ê智慧你ê寂寞，你ê愛敢猶有人知？泰雅這兩字愛按怎寫才有好將來......彼粒號做公義ê銃子mā無聲無說。我順你ê目神向遠遠，遠遠看過去天頂，有一座彩虹做ê橋tī風裡，飄搖祖靈，teh擛手敢若一杯，唌人喙舌足芳，足芳ê米酒咱知，彼是秋天稀微ê秋天，一直teh等teh等，等天地拋荒等歲月變老，等神kah鬼，做伙吼......#光景147樂信瓦旦（Losing Watan 1899-1954）：Lo̍k-sìn Uá-tàn，泰雅族大豹社人，漢名林瑞昌，日名渡井三郎、日野三郎，醫師、民代、原民運動者，終生致力提升泰雅族人與原住民族的生活和地位，1954年4月17日，與鄒族領袖高一生等原民菁英遭中華民國的中國國民黨政府以‘’匪諜‘’羅織罪名，處決於新店安坑刑場。空喙：khang-tshuì，傷口。擔頭：tann-thâu，抬頭。擛手：ia̍t-tshiú，招手。唌：siânn，吸引。（2024/9/20）#詩聲筆記<唸讀>寒人誠寒。彼年春天，定著彼寒人koh較寒。1954年4月17。這工，是哀傷ê一工。咱台灣ê原住民，定著愛會記得這工。這工，樂信.瓦旦和鄒族ê高一生，kah其他4个頭人，hōo人安一个「共匪」罪名，做伙tī新店安坑刑場銃殺。殺人兇手是中國國民黨政府。見擺讀著這段歷史，就目箍澹。毋但in，koh有濟濟ê原民受難者。遮个原住民菁英，彼陣若無死，歷史定著會改寫。極加悲哀ê是，彼時講人通匪ê，這馬家己leh通匪。Koh較悲哀ê是，大多數原民ê選票，到今猶攏頓hōo這个萬惡罪魁。咱無責備原民，顛倒是毋甘。黨國時代洗腦教育ê敗害，揜貼ê原鄉，消息欠靈通，較無法度走閃。洗kah齊齊齊。這馬中國黨，規捾kap做伙，攻占國會；將來不幸若hōo共產黨統治，悲劇重演，定著走bē去……其實悲劇一直leh輪迴。才號做歷史。2024年秋天，去樂信瓦旦ê部落行踏，新北三角湧、桃園腳板山踅一飛，這款感觸愈深刻。行踏轉來，寫一首詩記念伊，一直無彼个氣力好唸讀；透早，天誠gàn，想講kā提出來唸看覓仔leh，無疑悟，愈寒。毋過，咱leh想，上無天頂ê樂信，定著會加淡薄仔溫暖。按呢，寒mā甘願。（2026/1/8/詩聲筆記）Powered by Firstory Hosting