阿愷之聲Podcast
阿愷之聲不只是一个講臺語的Podcast，我準備用鹿港腔來講萬事萬物，歡迎收聽臺語通勤第一品牌！
本節目現子時有六个單元，歡迎收聽指教，恁若聽了會合，歡迎贊助阿愷之聲繼續放送落去：https://voiceofakai.oen.tw/
一、空中泡茶間
阿愷之聲Podcast上受歡迎的單元，這个單元阿愷主要邀請社會各界的好朋友，來講生活、講事業、講理想、講人生，用臺語講萬事萬物，萬事萬物攏是咱人生！
二、講鹿港說鹿港，鹿港說不盡
鹿港人致意鹿港事，這个單元專門講鹿港的過去和未來，透過講解最近的新聞事件，抑是邀請各界朋友用各種觀點來討論這个所在，若是想欲瞭解鹿港會使對這个單元開始。
三、文學烏亂濺
阿愷之聲Podcast的經典單元，阮欲來講國內最近新出版的好冊，閣有國外的經典作品，無論是文學、社會科學抑是歷史文化，這个單元除了讀冊會分享，有時陣閣會邀請作者本人來講寫作。
四、洛津浪音樂
台長以前的夢想就是做音樂電台的主持人，無論是古典音樂、JAZZ、抑是當代臺灣的音樂創作，這个單元會使聽著音樂背後的故事。
五、學姊你敢有閒？
全新單元，副主持人是咱懷念的鹿港學姊，阮每个月會討論一个生活題目，努力變作「台語相談室」第一品牌，若有任何想欲開講的主題，歡迎call in
六、台長時間
台長三不五時會出來坐檯，無論是回答聽眾call in抑是分享節目製作的想法，台長時間是一个和聽眾朋友互動的單元。
最後，歡迎來去以下所在收看阿愷之聲Podcast，恁會使追蹤來接收上新的節目消息：
• facebook：https://www.facebook.com/VoiceofAKai/
• instagram：https://www.instagram.com/voiceofakai/
• threads：https://www.threads.net/@voiceofakai
• X：https://twitter.com/voiceofAKai
Powered by Firstory Hosting
エピソード一覧
EP173 洛津浪音樂：來去東京聽爵士 ft.吳易叡
這遍來到阿愷之聲Podcast「洛津浪音樂」單元的來賓，是成功大學不分系學士學位學程的吳易叡教授，伊同時是鬥鬧熱走唱隊的keyboard兼唱歌，非常有才情。阿愷非常歡喜會使和易叡去東京聽兩場有夠讚的爵士音樂會，這集節目準備對遮講起。為啥東京人遮愛聽爵士？而且有法度遮冷靜咧聽爵士？這遍阮去Blue Note Tokyo聽傳奇鼓手Harvey Mason的三重奏，閣有Suntory Hall聽Brad Mehldau的鋼琴三重奏，哎，印象有夠深。尤其Brad Mehldau是易叡和阿愷攏足欽佩的鋼琴家，這遍伊和貝斯手Christian McBride和鼓手Marcus Gilmore的合作，非常精彩，是我這遍東京旅行上美麗的記持（回憶）。聽完這集，恁會使繼續收聽EP169台長時間，東京實在袂無聊阿！► 節目重點• 東京爵士樂迷的特色？• Blue Note Tokyo的聽眾觀察？• Suntory Hall竟然有威士忌的味？• Brad Mehldau彈鋼琴親像咧變魔術？• 竟然下願想欲聽Keith Jarrett的演奏！？► Brad Mehldau的專輯推薦｜易叡推薦《After Bach》，阿愷推薦《Live in Tokyo》► 節目音樂｜鹿港新聲閣► 歡迎贊助阿愷之聲Podcast：voiceofakai.oen.twPowered by Firstory Hosting
EP172 空中泡茶間：馬祖的滋味？ft.《味道的航線》作者黃開洋
福州伯唐山過台灣，身揹三支刀：鉸刀、菜刀、剃頭刀！這遍來到阿愷之聲Podcast「空中泡茶間」的特別來賓，是臺大地理學研究所的博士生黃開洋，伊最近佇前衛出版社出版了一本寫馬祖好料的冊《味道的航線：從馬祖到台灣，福州飲食文化探秘》， 這本冊千萬毋通睏前讀，因為腹肚會足枵（iau，餓）！對一位地理學家來講，探討食好料背後的故事是伊的專科。開洋來到馬祖田野調查幾落冬，伊發覺福州菜來到馬祖、甚至來到台灣以後，竟然出現趣味的變化，咱日常生活愛食的好料，背後竟然有一段臺灣豐富的族群史，開洋想欲用這本冊來回答到底啥物是「臺灣味」？這集節目會使聽著馬祖話/福州話，緊來收聽！► 節目重點• 寫這本冊的副作用竟然是變大箍（胖）？• 作家和馬祖的牽連竟然如此複雜！？• 為啥研究福州菜會來到鹿港？• 阿愷食三十年的鹿港肉燕竟然是福州菜？• 開洋真心推薦馬祖一定要去的所在！► 讀這本冊｜味道的航線：從馬祖到台灣，福州飲食文化探秘https://www.books.com.tw/products/0011012470► 特別感謝｜前衛出版社的佩穎編輯► 節目音樂｜鹿港新聲閣► 歡迎贊助阿愷之聲Podcast：voiceofakai.oen.twPowered by Firstory Hosting
EP171 文學烏亂濺：托爾斯泰〈伊凡．伊里奇之死〉ft.溪州阿倫
歡迎收聽阿愷之聲Podcast「文學烏亂濺」單元，本集節目換阿倫來主持，這遍欲來講托爾斯泰的小說〈伊凡．伊里奇之死〉，聽講托爾斯泰後世人（下輩子）是彰化人？！托爾斯泰（1828-1910）出世佇舊俄羅斯時代的頂層家庭，厝內是大地主，本身是好命囝。但伊後來參與克里米亞戰爭，人生觀改變，托爾斯泰的寫作開始關心人性和社會，這篇〈伊凡．伊里奇之死〉就是其中的代表作品，伊只用四萬字就寫出人性的複雜，有夠好看。這集有夠趣味，阿倫頭一遍主持，歡迎收聽阿倫之聲溪州放送！► 節目重點• 托爾斯泰和阿愷攏是砲兵？• 列寧對托爾斯泰的看法竟然是......？• 舊俄羅斯社會竟然和彰化仝款迷信？• 阿倫開破俄羅斯姓名學？• 這篇小說根本就是臺灣鄉土文學？！► 來讀小說｜伊凡．伊里奇之死https://www.books.com.tw/products/0011018134► 影像提供｜陳君宥► 節目音樂｜鹿港新聲閣► 歡迎贊助阿愷之聲Podcast：voiceofakai.oen.twPowered by Firstory Hosting
EP170 空中泡茶間：誰的本土認同？ft.前總統陳水扁
這集阿愷之聲Podcast「空中泡茶間」單元實在非常緊張，這是本節目開台四年來邀請著上大跤（大咖）的來賓，咱歡迎臺灣前總統陳水扁！2006年阿愷讀高中一年級，彼年的歷史課本頭一遍出現整學期的「臺灣史」，這年是阿扁做總統的第六年，也是教育部實施九五暫綱的頭一年。總算，臺灣的歷史不再是對中國史拆出來，咱總算有機會瞭解家己的故事，這件代誌對我這个世代的人影響誠大，毋管是後來的318學生運動，甚至是恁所收聽的這个全臺語Podcast阿愷之聲。咱先轉去2000年的臺灣政壇，面對朝小野大、保守勢力為主的阿扁總統，當年是按怎推動本土化政策？講著阿愷相當致意（在意）的臺語，為啥阿扁總統的臺語演講遮爾厲害？伊會按怎看臺語文化的未來？面對細漢時就非常尊敬的政治家，這集節目台長實在有夠激動，節目最後，阿愷甚至有機會和阿扁總統合唱2004年「手牽手護台灣」的主題曲，由陳明章作詞作曲的「伊是咱的寶貝」，哎！實在非常圓滿，感謝這一切的發生！► 節目重點• 彼當年面對朝小野大，按怎推動本土化政策？• 透過新課綱，彼當陣臺灣需要啥款的本土認同？• 為啥阿扁總統用臺語演講遮呢厲害？• 按怎看臺語文化的未來？• 阿扁總統予文化工作者的一句話？► 特別感謝｜陳君宥提供相片、江羿賢和李孟佑牽成訪問► 節目音樂｜鹿港新聲閣► 贊助節目｜ https://voiceofakai.oen.twPowered by Firstory Hosting
EP169 台長時間：阿愷去東京
這集阿愷之聲Podcast「台長時間」單元，欲來分享阿愷去東京旅行所拄著（遇到）的各種朋友，閣有對東京和彰化的觀察思考，緊來收聽！► 節目重點• 為啥彰化人愛去繁華的東京？• 阿愷佇東京竟然熟似日本朋友？• 東京竟然有一群人咧講台語？• 東京的無聊理論？► 節目音樂｜鹿港新聲閣► 贊助阿愷之聲｜ https://voiceofakai.oen.twPowered by Firstory Hosting