阿愷之聲Podcast
阿愷之聲不只是一个講臺語的Podcast，我準備用鹿港腔來講萬事萬物，歡迎收聽臺語通勤第一品牌！
本節目現子時有六个單元，歡迎收聽指教，恁若聽了會合，歡迎贊助阿愷之聲繼續放送落去：https://voiceofakai.oen.tw/
一、空中泡茶間
阿愷之聲Podcast上受歡迎的單元，這个單元阿愷主要邀請社會各界的好朋友，來講生活、講事業、講理想、講人生，用臺語講萬事萬物，萬事萬物攏是咱人生！
二、講鹿港說鹿港，鹿港說不盡
鹿港人致意鹿港事，這个單元專門講鹿港的過去和未來，透過講解最近的新聞事件，抑是邀請各界朋友用各種觀點來討論這个所在，若是想欲瞭解鹿港會使對這个單元開始。
三、文學烏亂濺
阿愷之聲Podcast的經典單元，阮欲來講國內最近新出版的好冊，閣有國外的經典作品，無論是文學、社會科學抑是歷史文化，這个單元除了讀冊會分享，有時陣閣會邀請作者本人來講寫作。
四、洛津浪音樂
台長以前的夢想就是做音樂電台的主持人，無論是古典音樂、JAZZ、抑是當代臺灣的音樂創作，這个單元會使聽著音樂背後的故事。
五、學姊你敢有閒？
全新單元，副主持人是咱懷念的鹿港學姊，阮每个月會討論一个生活題目，努力變作「台語相談室」第一品牌，若有任何想欲開講的主題，歡迎call in
六、台長時間
台長三不五時會出來坐檯，無論是回答聽眾call in抑是分享節目製作的想法，台長時間是一个和聽眾朋友互動的單元。
最後，歡迎來去以下所在收看阿愷之聲Podcast，恁會使追蹤來接收上新的節目消息：
• facebook：https://www.facebook.com/VoiceofAKai/
• instagram：https://www.instagram.com/voiceofakai/
• threads：https://www.threads.net/@voiceofakai
• X：https://twitter.com/voiceofAKai
Powered by Firstory Hosting
All Episodes
EP179 空中泡茶間：反課綱運動十週年 ft.廖崇倫
「二零一五年的熱天，一个十七歲的高中生按怎面對一个時代？」這集阿愷之聲Podcast「空中泡茶間」欲來回顧一場歷史事件，節目來賓是咱懷念的廖崇倫（溪州阿倫），這場發生佇十年前的高中生反課綱運動，阿倫參與真深，到底社會運動按怎影響一个人？台長知影阿倫就是對彼年的新聞開始，當時使我意外的是，電視中彼位高中生面對記者訪問竟然如此穩重。回顧彼幾年，自2014年的三一八學生運動到2015年的高中生反課綱，臺灣社會親像經歷過一場風颱，後來2016年相對進步的政黨取得執政，本來叫是總算無風無雨，彼年我和阿倫攏來到台北讀冊，又閣是因為社會運動，我和阿倫意外佇街頭相拄（相遇），無想著後來阮會變成主持阿愷之聲的一對手（笑）。這集節目我邀請阿倫來回顧這場影響伊青春的一場社會運動，為啥當時伊會投入參與？面對各種未知的挑戰，伊敢袂驚？若有機會轉去以早，阿倫敢有後悔的代誌？節目放送這日是七月三十號，十年前的今仔日，一位參與抗爭的高中生失去生命，後來一群高中生佔領教育部頭前廣場，彼當時誰攏毋知，後來逐家大漢了後會變啥款？► 歌曲推薦｜再會啦心愛的無緣的人、菅芒花► 節目相片｜陳君宥► 節目音樂｜鹿港新聲閣► 贊助節目｜https://voiceofakai.oen.twPowered by Firstory Hosting
EP178 空中泡茶間：美國人佇芳苑？ft.邵杰Jordan
彰化芳苑就親像美國的肯塔基州（Kentucky）？這集阿愷之聲Podcast「空中泡茶間」的來賓是我一位佇彰化芳苑的美國朋友邵杰Jordan，伊當初提著Fulbright獎學金來到彰化教英文，後來竟然佇芳苑一住就住四年，敢講Jordan袂無聊？為啥Jordan會來芳苑？甚至為啥Jordan會曉講台語？我會熟似Jordan是因為我的紐約朋友Miguel（參考EP135），其實每一年攏有一批美國大學畢業生來到彰化教英文，但正經會對這个所在有感情的，Jordan會使是非常特別的人。後來我和Jordan變成語言交換的朋友，伊教我英語，我教伊台語，Jordan講伊的厝邊隔壁攏是序大人，所以臺語比起華語佇芳苑閣較有路用。節目錄音彼下晡是Jordan佇芳苑的最後一日，阮約佇旋味咖啡這間對Jordan學台語來講真重要的咖啡廳。錄音完，我和Jordan來到普天宮三樓，伊介紹我看芳苑的東邊，這風景有田有厝，對我來講真普通，但Jordan卻是目箍紅，伊實在毋甘離開彰化，突然間，連我攏予伊感動囉。歡迎收聽這集節目，來聽美國人按怎看彰化！► Jordan學台語攏看啥冊？初期讀鄭順聰的《臺語好日子》和《台語心花開》、大郎頭的《台語原來是這樣》、劉承賢的《語言學家解破台語》；有相當程度了後，讀王秀容的《咱來讀讀》、洪淑昭台文翻譯的《傲慢佮偏見》，推薦逐家！► 特別感謝｜彰化芳苑旋味手感咖啡的場所和咖啡► 節目音樂｜鹿港新聲閣► 贊助節目｜https://voiceofakai.oen.twPowered by Firstory Hosting
EP177 空中泡茶間：劇場演員按怎變？工商服務阮劇團《鬼地方》和《小雪》ft.余品潔＆鍾汶叡
這集阿愷之聲Podcast「空中泡茶間」非常歡喜邀請兩位阮劇團 Our Theatre的優秀演員PJ余品潔和鍾汶叡（小蝦）作伙來開講，到底劇場演員按怎變出一个角色？生活、創作和劇場之間的關係又閣是啥？工商服務時間！今年7月18號到8月24號阮劇團準備來到台北空總劇場連演六禮拜，主題《噪音風暴》總共推出四齣戲，包括《鬼地方》、《小雪》、《熱天酣眠》和《可愛的人們》，歡迎逐家去看戲！► 來去買票｜阮劇團╳噪音風暴╳空總劇場：https://bit.ly/44W67h5► 有折扣碼｜阿愷之聲聽友專屬88折優待：voiceofakai► 特別感謝｜王書柏提供的心之卡比► 節目音樂｜鹿港新聲閣► 贊助節目｜https://voiceofakai.oen.twPowered by Firstory Hosting
EP176 文學烏亂濺：彼岸的川婆 ft.李昂＆李桐豪
💺 聽講這集節目有博愛座？！本集阿愷之聲Podcast「文學烏亂濺」單元，非常榮幸邀請記者作家李桐豪作伙主持，因為這集特別來賓是咱文壇媽祖婆aka鹿港杉行街鄉親李昂老師，阮準備來講今年四月出版的新冊《彼岸的川婆》。作家李昂總算完成「神鬼三部曲」小說計畫，包括2004年《看得見的鬼》、2011年《附身》到今年這本《彼岸的川婆》。其中，小說創造出來的「鹿城」靈感來自李昂老師的家鄉鹿港，內底的重要角色定定是女人、平埔族、甚至是鬼，透過這款非主流的角色來挑戰現主時的大歷史和父權社會，會使講是李昂老師回應時代的一種方式。這集節目對鹿港的神神鬼鬼講到小說創作，甚至連博愛座攏讓出來囉，面對愈來愈極端、破碎化的網路時代，到底李昂老師會按怎看待文學創作？這集節目實在精彩，緊來聽兩个無仝時代的鹿港人用臺語開講，一府二鹿，鬧熱滾滾！鬧熱滾滾！► 節目重點• 鹿港是一个神神鬼鬼的所在？• 個人的靈異經驗按怎影響文學寫作？• 寫作超過六十年的李昂老師按怎看當代社會？• 小等咧，博愛座事件是按怎？• 按怎保持寫作的熱情？► 來讀新冊｜李昂《彼岸的川婆》、李桐豪《子彈與玫瑰》https://www.books.com.tw/products/0011016228https://www.books.com.tw/products/0011003421► 特別感謝｜李桐豪、吳紫莖► 節目音樂｜鹿港新聲閣► 贊助節目｜https://voiceofakai.oen.twPowered by Firstory Hosting
EP175 學姊你敢有閒：第一擺出國的心情？ft.鹿港學姊
歡迎收聽阿愷之聲Podcast臺語相談單元「學姊你敢有閒」，這集咱鹿港學姊欲來分享第一擺出國的心情，敢講外國月娘真咧較圓？大學讀英文系的學姊，細漢時的夢想就是去美國旅行，後來伊做幾落份小工（打好幾份工），儉錢買機票，第一擺吸著美國的空氣，學姊講彼款感覺伊永遠會記著。後來學姊的工課（工作）是國際線業務，定定飛歐洲，雖然出國已經變成日常的一部分，但學姊猶緣感覺，比起佇彰化，人佇國外較有法度盡量做家己。這个時代出國已經無稀罕，但人生總是有彼「第一擺」，到底第一擺離開彰化遮遠是啥款的感覺？歡迎收聽這集節目。► 背景相片｜學姊頭一擺去美國做小工（打工）► 節目音樂｜鹿港新聲閣► 贊助節目｜https://voiceofakai.oen.twPowered by Firstory Hosting