寫詩ê人
Powered by Firstory Hosting
<出山>風敢若吹bē煞憂愁一片一片搖動你就放hōo輕鬆kā當做一齣美夢風敢若吹bē煞天,小可寒路是有較坎坷一寡仔你著寬寬仔行免驚惶,有神做伴你免問風beh吹去佗四界攏有花ê芳一山接一山一工接一工做你綴風去雲遊四海Kā行hōo透逐个有向望ê所在阿爸啊!這个罪惡沉重ê世間永遠永遠免koh倒轉來......#秋天39阮阿爸ê喪事,順老母ê意按咱民間禮俗來辦,厚工、吵koh開錢,mā是拖磨。11工貼貼;前日出山ah。留tī世間賰ê苦疼,咱歡喜來擔。敢若:kánn-ná,好像。佗:toh/tah/tuah,哪裡。綴:tuè,跟隨。向望:ǹg-bāng,希望。(2026/11/3)#新版型狀況不穩,有些字上傳後會自動校正成非原文的字。這篇,註解裡的“世間”,變成“世上”,詩文,逐个/逐一,這个/這,倒轉來/倒轉。字亂跳越來越多,且詩文仍無法分段,唉。原文請見fb:https://www.facebook.com/share/p/19UuKa9XoD/Powered by Firstory Hosting
<安魂曲>秋天ê風啊!做你去自由飛翼股展開,就免管伊世間彼lō是是非非自由ê風啊!世界無邊曠闊咱人ê罪孽,按怎操煩mā是無較縒飄撇ê風啊!咱免行憂悶黃泉路免蹛彼lō艱苦ê墓仔埔翼股展開,沿路沿路,攏是歡喜這个世間無啥物好掛意做你自由自在放浪去放浪去翼股展開秋天ê風啊......#秋天36阮阿爸,基層公務員退休;細漢,老爸早死,厝散赤;姑不將hōo阮老母招,tī彼時ê社會價值觀,定著滿腹委屈。今,變做風,無煩無惱ah,做你自由飛。傷痕,免要意,我kōo詩勻勻仔來kā安搭。&*翼股:si̍t-kóo,翅膀。彼lō:那個。無較縒:bô-khah-tsua̍h,無效用。飄撇:phiau-phiat,浪漫。蹛:tuà,住。(2026/10/29)Powered by Firstory Hosting
<往生>起風ah彼片焦葉,自在落塗化做逐年ê春天清芳免閣拖磨ah操勞規世人,苦楚定著有神安搭綴風,吹去海角天邊無病無疼ah肩胛頭,千萬斤重勻勻仔kā放輕鬆免插伊世間啥人拄啥人風,微微leh吹秋天,是哀愁ê花花開ah我tī目墘鋪一條幸福ê路雖罔毛毛仔雨免驚,有眾生萬物看顧#秋天30阮阿爸(1938-2026)tī病院拖磨個外月了後,前日轉來厝療養,今仔日透早5-6點,安眠當中往生。#台東龍眼:番龍眼,俗名芭樂龍眼(Pa̍t-á-lîng-gíng),老爸失智這幾年,幾乎每天都在此樹下拔草掃樹葉。這棵樹,五、六十歲,我許多童年記憶。焦葉:ta-hio̍h,枯葉。安搭:an-tah,撫慰。免插伊:bián-tshap-i,別理他。拄:tú,連詞。目墘:ba̍k-kînn,眼眶。(2026/10/22)#改版後頁面,詩無法分段,且某些字呈現異常,且將“koh”改成漢字“閣”,完整全文請看FB連結:https://www.facebook.com/share/p/1FH4FPK3Ge/Powered by Firstory Hosting
<一个人>賰一个人ê時就來去旅行啦!全世界,攏變你ê你ê影,bē koh孤單綴你千山萬水千山萬水就kā遊山玩水千千萬萬ê你一个接一个,出世賰一个人,是智覺毋是事實,因為咱自本就是一个人一个人自本就是一个世界和別人無底代花,家己開家己媠四界摸飛ê時你就是千山萬水自在......#安搭42賰:tshun,剩。綴:tuè,跟隨。無底代:bô-tī-tāi,不相干。摸飛:moo-hui,四處遊玩。媠:suí,漂亮。(2026/5/21)#詩聲筆記<覺悟>凡勢,你會感覺現此時ê我,根本就是一葩譀古。我自2015年退休了後,平常時仔攏是一个人過生活,規工和人講無半句話,是四常ê代誌。這馬這種社會連買物件mā免開喙。載具、鑢卡,自動結數。連找錢都免。毋過,大部分時間我bē感覺寂寞孤單,因為足早我就智覺,咱人攏是獨立ê性命,自本就是一个人。毋過你知,人若心剖開,攏誠軟汫,有當時仔彼款智覺會拍無去,有彼款‘’賰‘’一个人ê感覺;彼个‘’賰‘’,才致使寂寞孤單。若像hōo天神放捒ê囡仔仝款;眼前,一片茫茫ê世間。我敨解ê步數,毋是去揣人,是家己一个人去旅行。換一个情景,koh kā家己抾轉來。效果上好ê是山林;大自然是咱外家;傷痕,真緊就會安搭。彼工,我koh去行躊躇7年跤才振動ê古路,這款刺疫ê熱天,有影,隨心涼脾土開。樹木草花、鳥隻蟲thuā,山溪塗沙,攏是友志。攏是家己ê化身。咱台語人,tī這款嘻嘩社會,彼款‘’賰‘’ê意念,定著常在會浮出來;咱愛有這款覺悟。尤其我這款寫詩、又koh寫彼款詩ê人,永遠無可能像人日花閃爍遐奢颺;咱極加是一葩暗毿ê月光。覺悟,譀古才有微微光,小可炤入去幸福ê門。(2026/6/3)Powered by Firstory Hosting
<油桐花>山,一搭一搭直直白春天beh焦蔫ah風,若吹花,就落雨ah輕輕仔,飛飛入你目睭飛入阮心肝底變做相思飛去海角天邊化做雪輕輕,落塗啊!一節彎彎斡斡媠媠ê,戀愛古......#安搭24焦蔫:ta-lian,枯萎。斡:uat,轉彎。(2026/4/22)#詩聲筆記<愛恨交纏>有影!咱人,和世間,總是一半歡喜,一半哀愁;悲喜交集,是性命ê真面目。彼工下晡,雨拄落煞,看烏雲慢慢仔leh散,就緊來去社頭山裡行行leh,一工無來浸樹林,吹風洗浴,規身軀就礙虐礙虐。你知,椅條定著未焦;免驚,我揹仔內有攢塑膠彼款噗仔紙,kā舒leh,不止仔四序。我喙舌頂ê咖啡,當leh神神心爽ê時,一陣微微風,無疑悟,頭前一二十公尺遠彼欉油桐花,雄雄suah敢若落雪leh,媠甲;一幅天生自然、恬靜ê圖,浮tī目睭底。歡喜。啊是leh哀愁啥物?你定著會憢疑。咱知,油桐花,生tī遮窮實是無自然ê代誌;伊,毋是在來原生,是中國籍ê入侵種。往過,為著beh煉桐油、取柴料,種kah滿山滿嶺;這馬,無經濟價值ah,suah湠kah規山坪,對咱生態環境是大敗害。更加僥倖ê是,咱人kā伊和客家文化縛做伙leh絞;其實根底並無任何牽連,是假包ê文化。活動,鬧鬧熱熱;錢開了,客語suah綴嘻嘻嘩嘩ê笑聲,慢慢走消失去ah。敢若無人要意......毋過,花,正港是媠ê;活靈靈ê性命。花媠無罪;人ê孽,愛伊來擔,講bē得過。敢毋是?愛恨苦樂,交纏;bē輸一葩戀愛古。唉!寫一首來贖罪。(2026/4/30)Powered by Firstory Hosting