本集介紹

 
Kā詩，一字一字拆開
拊散，所有ê執迷、掛礙
一重一重，自然開破
 
彼粒初心
猶澹澹，恬靜
吊tī空中teh搖
 
若有，若無
勻勻仔透露，一寡仔
性命ê消息
 
咱知，有幾欉樹仔
無緣無故去做仙矣
 
賰淡薄仔疼
摻一屑仔花芳，綴風
掀過你，暗暝ê冊頁
 
眠夢，已經延延
Bē赴溫存ê情意
規氣放hōo空
留leh後世人，寬寬仔寫
 
一張一張，貼心
喘氣ê白紙
 
 
 
註解：
拊：hú，擦拭。
澹：tâm，濕潤。
綴：tuè，跟隨。
延延：iân-tshiân，延遲。

 （2023/6/28）

#詩聲筆記
──《空白》台語詩集/話頭


 
 拄才查手機仔，寫這本空白詩集ê意念，是2021年9月22日。彼陣當tī十八彎古道摸飛，看妖嬌美麗ê樹林綴風搖，心肝頭歡喜定著，嘛毋知是按怎，煞雄雄想起咱寫ê詩集，尤其台語詩，逐本都囥tī倉庫等生菇，難免小可厭氣──規去來印空白手摺簿仔，凡勢較好賣leh？
 
 愈想愈感覺有影。現此時，大環境ê緣故，台語人愈來愈少；捌台文ê人，更加是少；會買咱台語詩集ê人，koh是少數內面ê少數。按呢，通台灣賰幾个人，手指頭仔大概算會出來。空白手摺簿仔，上無有實用ê功能。詩，看有食無；若是台語詩，僥倖喔，看無koh食無，對一般人來講，不如來啉一杯星巴克，實在koh bē傷目睭……
 
 這粒瘦卑巴ê子，自按呢浸tī頭殼內一月日，了後我生出一首號做〈空白〉ê詩，kā藝術理念kah心情埋tī內底；規本詩集ê粗胚嘛漸漸有形矣。
 
 性命有時誠礙虐，咱ê詩，總是有一寡仔無想beh寫，一寡仔無才調寫；遐，規去kā變空白，起一間厝hōo蹛。若親像孤魂野鬼，也需要咱安塔、祭獻。
 
 窮實，這款詩ê空白，意象是上飽滇。在你幻想眠夢，在你凌治thún踏，甚至kā你ê詩你ê圖你ê意念kah色緻，攏總搬入來蹛嘛可以；按呢，這本就變做你獨一無二ê手工冊。
 
 這款設計，對咱台語文來講，嘛是一種運動。咱知，若beh行這條路，著愛覺悟，無悲觀ê權利。成做一个詩ê創作者，免講不時會想空想縫，想看有新ê齣頭無？按呢咱台文創作，路才會開闊，嘛免驚無細膩行入去稀微ê無尾巷。
 
 Koh再講，這本空白，嘛毋是完全空白，猶有一首實體ê話頭詩活跳跳tshāi tī遐，哈，雖罔伊號做空白。
 
 你若買過曲盤，定著知影，有一款「單曲唱片」，hennh啦！咱這本毋但是「藏頭詩」，猶是「孤首詩集」──按呢通譯敢好勢？
 
 啊，不管啦！咱毋是beh趁名撈錢，兩冬孵一粒卵，敢無值得你開幾箍銀？仝款是限量印法ê，也無遐濟間厝通賣啦。這棟，性命光景第一排。Beh歡喜結緣就來。平安。
 
（2023/7/1）
 
#話尾

 
 
 資深詩人向陽，寫過著名的填空詩，以空白之框，暗諷史料的斷裂與威權的安檢。這在詩的創作上，無疑，是厲害的手法。
 
 兩年前，921地震紀念日隔天，我在十八彎古道運動時，忽然想到詩的種種，更想到我目前全心投入的台語詩，在主流的美學與市場中，那種比困境更大的困境，真的想乾脆整個空掉，不用挖字，全變成空白算了。
 
 沉默，是最大的抗議；而空白之姿，是最大的沉默。這是古今困頓之人，有難言之隱時，常有的舉止。
 
 去年底，中國學生的白紙運動，其意念根源也來自於此吧。只是，專制獨裁政權，連留白的自由也沒。
 
 六月底，台語小旅行出任務回來隔天，牙齒突然發炎，那種疼痛，讓我無法安心創作；上山運動的日常，也暫緩，生怕燥熱天氣，又炎上牙根。
 
 專心閉關吃抗生素的同時，想想就開始將兩年前，空白詩集的發想，付諸行動，著手設計、編排、完稿，送印刷。我用的影像自由軟體，還非常不熟練，需更多的練習。哈，這是自囚最好的時機。
 
 所有美學，都來自人的詮釋。擁有詮釋權的人，比如專家、學者、傳媒、評審、刊物主編……等等的審美觀，幾乎主導了整個主流價值的發展與定義。讀過藝術史的人都知道，達達主義大師杜象（Henri-Robert-Marcel Duchamp）那件驚人駭世的「尿壺」，不只是尿壺，是對當時主流美學的反抗與質疑。是的，我的空白詩集，就是那尿壺，那抵抗；準備迎接「眾人漩」的酷刑。默默無聞如我，雖不敢與杜象相比擬，但至少是我創作上的自我省思，也希望提供我念茲在茲的台文圈，多一個思維的角度與可能性。我們需要怎樣的創作？怎樣的詩？
 
 哈，當然我承認我是自己尿尿自己爽；因默默無聞，根本不會有幾人看到《空白》，所謂的「眾人」並不可能出現，會來注文交關的，都是同溫層一些有志。
 
 面對母語不友善的大環境，知其不可為而為之，就是藝術的極致。我對自己說過，只要還能寫，即便只剩一兩人相挺，也會繼續創作，我就為這一兩人而寫。這不是悲戚，是詩的骨氣與尊嚴。
 
 空白，也是一種宣告。
 
（2023/7/18）
 
 

Powered by Firstory Hosting