本集介紹

＜清明＞

祭祖虔誠上蓋大
合十注目雲做伴
行禮致意心靠岸
毋通舞甲火燒山

#台語七字仔簿
（2026/3/15）

#詩聲筆記
<電子金>

綴時行，先講結論：不管正信抑是迷信，我肯定宗教kah宗教儀式hōo咱人靈魂療傷ê功效。

信仰，著毋著，咱無才調去講。毋過，一寡儀式風俗，若牽涉環保kah人權問題ê時，著愛重頭思考伊ê本質。Kah語言仝款，這是文化一部份；文化是活ê，隨時leh變動，無可能bē改得；改毋改、按怎改，攏在人。

清明beh到ah，看新聞，台中、南投、苗栗當leh火燒山，幾若工ah猶未煞。看逐家老神神在在，你敢bē驚惶？

定著mā有燒墓草燒糞埽ê緣故。先講燒金；欠點足濟，上大其實是空污問題。有人提科學數字leh喃，講這污染占總pha數足少，愛尊重民間風俗，去掠大尾ê才著。我捌kōo一个例去比論：室內食薰/室外食薰。

燒金強beh是全民運動，廟寺、徛家、街頭巷尾以及現此時當leh燒ê墓仔埔，這款低層ê煙較歹散koh較猛，敗害敢若室內食薰；工廠大煙筒，煙是排去天頂，啊汽機車煙是較薄，影響無遐即時即刻，這算室外食薰。當然，污染源頭，咱攏愛盡量排除。

一个急性發炎，一个慢性中毒，佗一个愛先治？我蹛廟邊，算是煙ê受害者；所致，總是leh譀想，一款拜拜仙丹：電子金。

理路誠簡單：用一葩七字仔做金紙，唸讀代替燒金燒香，仝款向神祈福，環保koh平安。一支手機仔就OK。

改火燒癖過渡期，會當kā七字仔印落來燒，抑是kōo手寫愈有誠意，按呢一張紙就解決。

七字仔，是咱台灣傳統民間文學；以早台語人，免啥文學素養，凊彩就有才調鬥一葩來耍。推sak這，若變做一款新流行，對台語復振mā有幫贊，一兼二顧。哈，按呢咱台語人，人人變詩人，毋是空思夢想。

信仰ê精神若掠在，制度儀式無彼號bē改得ê啦；講bē改得，是一款執迷。講一个例就好：古早拜拜敢有mài-khuh、敢有清涼秀電子花車、電子看板？

聽講台北大廟行天宮，早就無燒金ah。這mā是證明。正港好tshuā頭。

想罔想，終其尾mā是家己戇想──哈，較早睏較有眠啦！

──2026/3/16

Powered by Firstory Hosting