本集介紹

「布克獎對臺灣文學的國際意義就是，咱總算有一個人會使代替龍應台，伊就是楊双子。」－黃崇凱

今年6月7號，阿愷之聲特別計畫「臺灣文學Live Podcast」來到臺南的南渡策室獨立冊店 ，我邀請小說家黃崇凱來討論「歷史的集體記持（記憶）和想像」，到底寫小說的人按怎理解眾人行過的歷史？

這場對談的後半場欲繼續來討論崇凱的寫作後台，到底伊按揣出臺灣歷史作為小說創作的空縫？而且，小說有法度對吐魯瓦寫到火星、對棒球寫到基督教，崇凱敢是一個平常時就足認真觀察生活的人？若是無靈感的時陣欲按怎？我也真好奇崇凱按怎看楊双子的《臺灣漫遊錄》得著國際布克獎對臺灣文學的意義？

最後，我邀請崇凱來讀一段伊2024年發表的小說《反重力》內底的〈刺殺〉，崇凱講這幾年到國外文學節才有較濟的機會來「唸小說」，顛倒佇臺灣咱較慣習聽作家討論創作的理念。這也是我真愛邀請作者讀小說的原因，因為我想欲知影，伊是按怎想像彼个時代的聲音？

續落來咱作伙轉去彼工臺南熱情的下晡，最後聽眾朋友的Q&A有夠讚，來聽阿愷和阿凱敲鑼奏鼓吹！

► 歡迎報名｜阿愷之聲彰化讀冊會Live Podcaast
https://forms.gle/EBVf9wTndnWDZhw18

► 贊助單位｜國藝會
► 特別感謝｜蘇聖欽的錄音工程、吳紫莖的封面照片，南渡策室的場所
► 節目音樂｜鹿港新聲閣
► 贊助節目｜https://voiceofakai.oen.tw

來讀小說｜反重力/刺殺

保羅跟他說起一個出外多年來做過幾十次的夢：阮厝往過住佇新竹頭前溪附近的矮厝仔，後面有一條鐵支路，我沿著鐵支路，一直行一直行，親像是欲去新竹機場。

阿志問，一直行，然後？

保羅回，只有一直行鐵支路。我也毋知是會行到機場抑是無。

阿志說，這應該是想厝啦，鐵支路、機場攏是離開去另外一个所在的symbol，老大兄有機會應該轉厝看看。

保羅感嘆，我實在沒面轉去。博士無拿，閣外國浪流連做工，若想起父母的期待，我心內就真稀微。見笑啦。

阿志笑笑，我參你半斤八兩啦，同款無提博士，若想到轉去潮州見父母，我就頭真大。厝內人當作我閣佇溫哥華讀博士，哪知我由西往東，趕啊趕到多倫多，今馬佇滿地可的餐廳內做人辛勞仔，我嘛講袂出嘴。不過我佇餐廳熟識幾个美國人，亻因攏是反對越戰，覕來加拿大過日，等候底時轉美國。我看大概是你仝輩人，抗議越戰，毋願拍彼場無正義的戰爭。今馬看起來，亻因的選擇是正確的。美國拍彼場戰爭，真正虛累累，了錢無講，遐的少年人的性命攏是浪費。

保羅說，確實有影。所以講，國民黨就是做細漢仔，美國大仔叫你做前哨基地你就愛接受。其實，佇冷戰下面，毋是偎美國，就偎蘇聯，國民黨無啥特別，當初南越吳廷琰政權嘛是真害，專門壓迫人民，黑西一大堆，參國民黨有拚，美國嘛是挺，挺佮軍人政變，挺佮家已落跑。最後彼个南越總統，落跑第一站就是去臺灣，聽講住過天母彼爿。我較早參加民權運動的時，蓋濟朋友拒絕做兵，燒徵兵卡啦、寄回徵兵卡啦，也有人予掠去關。像彼个拳王阿里嘛講，伊共越南人沒仇，亻因嘛沒人叫伊 nigger，所以毋願去戰場。這是足大的勇氣，運動員身體上好的時，無拳好拍，四界演講宣傳反戰、民權，予人真欽佩。我嘛有一寡朋友，參你捌的美國人仝款，覕往加拿大，這是有組織網路支援，淡薄仔像十九世紀美國內戰前的黑奴逃亡支援系統，叫做underground railroad，雖然有鐵支路的名，實際上是逐个所在無仝的黑人支援團體合作，送偷走的黑人去北邊自由州抑是加拿大。後來就有人咧講，六零年代反戰少年人覕做兵，就是倚靠這款的地下支援，也會使講是Second underground railroad。保羅說著說著，又點起只剩半截的菸，深深吸了一口。

阿志好奇，這地下網絡到底按怎運作？

保羅笑說，你老K爪耙仔喔，問這濟。

Powered by Firstory Hosting