本集介紹

【A郎台語小詞典】 EP. 01-坐賬/Chhē-siàu

訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/



【漢羅】

Chhē-siàu，mā有人講chē-siàu。

Chit塊詞ē-tàng拆開來稽考，chhē nā孤1字來講，to̍h有負擔責任ê意思，一般to̍h是ài用錢來負責任。咱ē-tàng tī王育德博士著作ê「台灣語常用語彙」內底看tio̍h chit句例句：「Nā phàng見，chiah chhē--你。」Chit句ê意思to̍h是講，nā mi̍h-kiāⁿ無--去，我chiah kā你賠償。賠償一般慣勢是ē講賠sióng，m̄-koh sióng chit ê音，tī辭典內底chhiâu-chhōe mā chhiau無賠錢ê意思，siông chiah有，che mā tī chia分享hō͘ ta̍k-ke做參考。

Chhē koh有另外1種用法，親像：「你nah ē去得失tio̍h王董--ê，得失土地公是飼無雞neh，khah-thêng-á chah 1 ê伴手，我chhōa你來kā王董--ê chhē不是。」Tī chit ê所在ê chhē to̍h是會失禮ê意思。

Só͘-pái咱chit-má koh翻頭轉來看chhē-siàu，伊kāng款mā是有2種意思，1種to真單純，to̍h是去la̍p錢、la̍p siàu ê意思，像講「咱chia̍h chit thoaⁿ，等--leh hō͘你去chhē siàu，好--無？」。另外1款to̍h是kā責任taⁿ--起-來，用嘴taⁿ，用行為taⁿ，用錢taⁿ，che to̍h ài看雙方面án-chóaⁿ chhiâu-chhek。Mā ē-tàng講：「我欠伊錢無才調hêng，伊to̍h來goán tau kā我ê電視、冰箱、phòng椅lóng chóng搬去chhē-siàu。」

Koh親像「A桃腹肚內ê gín-á，明華kám beh chhē-siàu？」To̍h是leh憢疑講明華是beh負責任，a̍h是ē kā tāi-chì póe kah lī-lī-lī ê意思。
--
Hosting provided by SoundOn