本集介紹

【A郎台語小詞典】 EP. 22-箍/Kho͘

訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/


【漢羅版】
今á日，咱beh來hâm各位做夥來研究chit字kho͘。Kho͘，有圓ê意思。圓kho͘-á，to̍h是1 ê圓圓ê形。

Kho͘ ē-tàng the̍h來形容圓thiāu-á形ê mi̍h-kiāⁿ，像講1 kho͘柴，1 kho͘魚，mā有柴kho͘ kah魚kho͘ ê講法。Nā beh keng體人siáⁿ lóng m̄-bat，mā ē講「你是bat 1 kho͘芋á番薯hio͘h！」有時chūn mā ē the̍h來講人，m̄-koh to̍h是khah kâng輕視，像講「你chit kho͘ hoⁿh，生雞卵無，放雞屎有niâ！」Kā人當做圓thiāu-á形ê「mi̍h-kiāⁿ」 teh講，chit lō話to̍h有影khah無客氣--ah！

Nā the̍h來形容地理上空間ê概念。Chit-kho͘圍á，to̍h是leh講chit pêng附近周圍ê所在。四kho͘圍á，to̍h是以ka-tī做中心ê四pêng邊--á ê所在，咱mā有講做四kho͘-liàn轉。

Nā the̍h來做動詞，有圍ho͘ tiâu ê意思。Kho͘桶，to̍h是做桶á，有1種職業hō做kho͘桶師傅，to̍h是專門leh kâng做桶á ê人。古早ê桶á是用柴phìⁿ做--ê，用鐵kho͘ kā siah好ê柴phìⁿ-á kho͘做夥，to̍h是柴桶，kek酒ê酒桶mā lóng ài有桶kho͘ ka kho͘ tiâu--leh。桶kho͘凡勢各位tiāⁿ-tiāⁿ ē聽--tio̍h，做1 ê例句來解說，to̍h真好理解，「Chit-má ta̍k ê無kāng心，你to̍h ài出來做桶kho͘，kho͘ hō͘ ta̍k ê ē團結，做夥來phah拚。」Tī chia，桶kho͘，to̍h是ài kā人kho͘-óa--lâi，kho͘-tiâu--leh，kho͘ ho͘ ē團結ê人。

Koh有1 ê趣味ê詞叫做月圍kho͘，che是1種天文現象，to̍h是月娘邊--á出現1 liàn光環，一般是天頂有薄雲ê暗暝chiah看ē tio̍h，形成ê原理kah日時ê khēng kāng款。

最後，咱tī A郎ê故事內底有講tio̍h「He桃á差不多伊雙手kho͘--起-來hiah-nī大」，to̍h是kā雙手kho͘做1 ê圓kho͘-á án-ne，桃á有jōa大，mā歡迎ta̍k-ê雙手ka kho͘--1-ē，想像看māi--leh。
--
Hosting provided by SoundOn