本集介紹

【民間故事】虎姑婆 上集︱Hó͘-ko͘-pô Siōng-chi̍p

編劇︱陳姿樺 Ko͘-chiáu
潤稿︱蔡逸民 BuLuhSuh
演出︱陳姿樺 Ko͘-chiáu
︱陳曉怡 Niau-tāu
︱柯王炳勳 Bí-leng
︱林佳祥 Chiá-siông
影片／音效後製︱林佳祥 Chiá-siông
音樂後製／校對︱陳曉怡 Niau-tāu
字幕︱林于真 A-chin

內文摘錄：

Lán ê祖先有流傳1 ê傳說，in講天下萬物，m̄管是動物a̍h是植物，只要吸收日月精華，koh經過不斷修行，to̍h會使chiâⁿ做人。
Khah早有1隻虎，伊to̍h有án-ne ê願望，向望ka-tī ē-tàng有chiâⁿ做人ê hit 1日。

Lán ê chó͘-sian ū liû-thoân 1 ê thoân-soat, in kóng thian-hā bān-bu̍t, m̄-koán sī tōng-bu̍t a̍h-sī si̍t-bu̍t, chí-iàu khip-siu ji̍t-goa̍t cheng-hôa, koh keng-kòe put-toān siu-hēng, to̍h ē-sái chiâⁿ-chò lâng.
Khah chá ū 1 chiah hó͘, i to̍h ū án-ne ê goān-bōng, ǹg-bāng ka-tī ē-tàng ū chiâⁿ-chò lâng ê hit 1 ji̍t.

Chit 1日，伊hâm進前kāng款tiàm-tī山--lih teh修行，伊hiông-hiông想tio̍h講：「Ah！害ā，我to̍h ài趕緊koh食kúi-ê-á人ê gín-á ，nā無to̍h無法度繼續維持人形--ā!」窮實m̄免食gín-á，nā是用心修行，mā是會使chiâⁿ做人。

Chit 1 ji̍t, i hâm chìn-chêng kāng-khoán tiàm-tī soaⁿ--lih teh siu-hēng, i hiông-hiông siūⁿ-tio̍h kóng: “Ah! Hāi-ā, góa ài kóaⁿ-kín koh chia̍h kúi-ê-á lâng ê gín-á, nā-bô to̍h bô-hoat-tō͘ kè-sio̍k î-chhî lâng-hêng--ā!” Khêng-si̍t m̄-bián chia̍h gín-á, nā-sī iōng-sim siu-hēng, mā-sī ē-sái chiâⁿ-chò lâng.

Hit隻虎四界走chhōe，lo̍h-bóe來到1戶人家厝ê頭前，看tio̍h 1 ê婦人人kán-ná beh出門ê款，tng tī in tau ê門口埕kah 3 ê cha-po͘ gín-á teh講話。

Hit chiah hó͘ sì-kè cháu-chhōe, lo̍h-bóe lâi-kàu 1 hō͘ jîn-ke-chhù ê thâu-chêng, khòaⁿ-tio̍h 1 ê hū-jîn-lâng kán-ná beh chhut-mn̂g ê khoán, tng tī in tau ê mn̂g-kháu-tiâⁿ kah 3 ê cha-po͘ gín-á teh kóng-ōe.

婦人人講：「好--ah！好--ah！阿母ài出門--ah！Lín今á日to̍h khah早睏--leh！E暗m̄-thang koh走出去chhit-thô，有聽tio̍h--無？」
細漢小弟阿勳jû講：「我chiah無ài hiah早睏--leh！」

Hū-jîn-lâng kóng: “Hó--ah! Hó--ah! A-bú ài chhut-mn̂g--ah! Lín kin-á-ji̍t to̍h khah-chá khùn--leh! E-àm m̄-thang koh cháu chhut-khì chhit-thô, ū thiaⁿ-tio̍h--bô?”
Sè-hàn sió-tī A-hun jû kóng: ”Góa chiah bô-ài hiah chá khùn--leh!”

阿母ná so阿勳ê頭ná講：「阿勳，你nā是乖乖聽話，明á載阿母to̍h買你上ài食ê李á糖hō͘你食，好--無？」
阿勳聽tio̍h有李á糖thang食，sûi tio̍h吞嘴nōa，bē輸iau鬼附身，歡頭喜面應講：「好--ā！好--ā！有李á糖thang食--ah！有李á糖thang食--ah！」

A-bú ná so A-hun ê thâu ná kóng: “A-hun, lí nā-sī koai-koai thiaⁿ-ōe, bîn-á-chài A-bú to̍h bé lí siōng-ài chia̍h ê lí-á-thn̂g hō͘ lí chia̍h, hó--bô?”
A-hun thiaⁿ-tio̍h ū lí-á-thn̂g thang chia̍h, sûi tio̍h thun chhùi-nōa, bē-su iau-kúi hū-sin, hoaⁿ-thâu-hí-bīn ìn kóng: “Hó--ā! Hó--ā! Ū lí-á-thn̂g thang chia̍h--ah! Ū lí-á-thn̂g thang chia̍h--ah!”

二兄阿民kā in阿母ê手牽--leh，問講：「阿母，你tang時chiah會轉--來？」
阿母mā kā阿民ê手牽--leh，應講：「阿民，你乖，阿媽破病，lín阿爸已經先去照顧阿媽--ah！阿母mā ài趕緊過--去。明á載過晝lín阿爸to̍h會轉--來。」

Jī-hiaⁿ A-bîn kā in a-bú ê chhiú khan--leh, mn̄g kóng: “A-bú, lí tang-sî chiah ē tńg--lâi?”
A-bú mā kā A-bîn ê chhiú khan--leh, ìn kóng: “A-bîn, lí koai, a-má phòa-pēⁿ, lín a-pah í-keng seng khì chiàu-kò͘ a-má--ah! A-bú mā ài kóaⁿ-kín kòe--khì. Bîn-á-chài kòe-tàu lín a-pah to̍h ē tńg--lâi.”

大兄阿祥tǹg胸坎掛保證，臭屁講：「阿母，你免煩惱，小弟in我會照顧。」
阿母chiâⁿ安慰阿祥hiah bat代誌，手kā阿祥ê手kó͘ so-so--leh講：「阿祥上乖--ah！按ne 2 ê小弟to̍h交代hō͘--你-ah-o͘h！」Sòa--落-來oa̍t頭kā阿勳講：「尤其是阿勳，你m̄-thang hiah狡怪，ài乖乖聽阿兄ê話。」

Tōa-hiaⁿ A-siông tǹg-heng-khám kòa pó-chèng, chhàu-phùi kóng: “A-bú, lí bián hoan-ló, sió-tī in góa ē chiàu-kò͘.”
A-bú chiâⁿ an-ùi A-siông hia bat tāi-chì, chhiú kā A-siông ê chhiú-kó͘ so-so--leh kóng：”A-siông siōng koai--ah! Án-ne 2 ê sió-tī to̍h kau-tāi hō͘--lí-ah-o͘h!” Sòa--lo̍h-lâi oa̍t-thâu kā A-hun kóng: ”Iû-kî sī A-hun, lí m̄-thang hiah káu-koài, ài koai-koai thiaⁿ A-hiaⁿ ê ōe.”


台語有字！完整漢羅/白話字POJ原稿，請看做工á人台語工作室網站

https://cho
-kang-a-lang.github.io/



[收聽Podcast]

SoundOn
https://bi
t.ly/ChKaL_SO



Spotify
https://s
poti.fi/48jD2tI



KKBOX Podcast
https://
bit.ly/ChKaL_KK



Apple Podcast
https:/
/apple.co/3HZyfD3



[社交平台 Siā-kau Pêⁿ-tâi]

Facebook
https:
//bit.ly/ChKaL_FB



Instagram
https://www.instagram.com/chokangalang/


X (Twitter)
https://twitter.com/chokangalang


方格子
https://vocus.cc/salon/cho-kang-a-lang
--
Hosting provided by SoundOn