概要

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！


訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/


【漢羅】

古早古早，tī 1 ê kài草地ê所在，有1 ê細細á-kiáⁿ ê庄社，庄內mā無幾戶人家，其中1戶是1對老公婆，老bóng老，ûn-ná ē-tàng pō͘土豆，身體勇健老康健，m̄-sī好額人，但是nā mài計較，日子猶原是ē得過。Khah無彩--ê是，lóng無半ê後生chŏ͘-kiáⁿ thang hâm in做伴。In少年ê時bat為tio̍h這項tāi-chì teh操煩，尾--á，歲頭漸漸á有，頭mn̂g mā ta̍uh-ta̍uh-á chham kúi絲á白ê時，kui-khì看破接受，hòng-hā了後，顛倒消遙自在，輕鬆度日。

Hit kang，in厝--ni̍h beh hiâⁿ火ê柴teh beh無--ā，老a公早起頓食了，chhiám-taⁿ hâm勾á索the̍h--leh，thàn日頭猶未kài iām ê時，趕緊beh去山頂樹林內，khioh kóa大柴轉來厝--ni̍h thang煮飯hiâⁿ燒水，mi̍h-kiāⁿ款好勢，人sûi to̍h出門。老a婆khiā tī門腳口看in ang順sī順sī起行了後，oa̍t頭入厝，桌頂款款--leh，to̍h kā ài洗ê衫á褲té tī大脚桶，beh去溪á邊洗衫，門關--leh，脚桶mo͘h--leh，人to̍h ùi溪á邊去。He thàng去溪á邊ê路á細細條á niâ，講是細條，mā無teh jōa歹行，行無jōa久，to̍h聽tio̍h sā-sā-kiò ê水聲，koh行--1-tè-á sûi to̍h到位。

來到溪á邊，a婆--ā tī chia洗衫洗幾十年--ā，早to̍h有慣勢坐ê位。溪á邊ê石頭siáⁿ-mih形--ê to有，tú好to̍h是有1-tè生kah親像椅頭á，坐tio̍h kài sù-sī，ta̍k piàn來洗衫，a婆--ā lóng坐tī chia。坐好勢了後，伊taⁿ頭看天，ka-tī nauh 1句講：「O͘h！天氣chiâⁿ好neh！」To̍h開始洗--ah。「To̍h趁chit-má日頭tng iām，kā衫緊洗洗--leh，到厝chiah phi ē乾。」心內tng leh想ê時，手mā無停khùn，1領褲tú洗好hiat去脚桶，oa̍t頭beh koh the̍h另外1 niá來洗ê時，目尾去眼tio̍h溪á頭hit pêng，有1 ê圓圓ê mi̍h-kiāⁿ，紅hóaⁿ-á紅hóaⁿ，浮tī水面頂，ta̍uh-ta̍uh-á流ùi chit pêng來。

A婆--ā心內giâu疑，「水流柴有影是看kài chē，to m̄ bat看過柴紅hóaⁿ-á紅hóaⁿ，he到底是siáⁿ？」人to̍h起hòⁿ玄，衫mā無koh the̍h起來洗，khang-khòe seng放--leh，注心去siòng hit ê mi̍h-kiāⁿ。He mi̍h jú流jú近，形體mā jú來jú清，a婆ka看ho͘真，「Aih-iò͘！Tang-sî-á是1粒大粒桃á！桃á nah有才調生kah chiah大粒！驚倒人！」He桃á差不多伊雙手kho͘--起-來hiah-nī大。「Kah hiah奇，生目睭m̄-bat看過這款--ê！」

溪á邊水淺koh清，水流平順平順，水底ê魚蝦水草，lóng ē-tàng看kah明明明，m̄-koh tī khah óa中ng ê所在，溪底ē hiông-hiông變深，人to̍h無才調koh行--過，ē tū水。A婆--ā liâu落去溪--ni̍h，準備beh hô͘ hit粒桃á，伊人ná行ná óa溪á中央，行kah已經kiōng beh無脚路thang khiā ê時，看tio̍h桃á koh 3丈to̍h ē ùi ka-tī面頭前流--過，m̄-koh nā照水勢，桃á ē流ùi溪á siōng深ê所在，to̍h是人bē khiā--chit hia，看範勢ka-tī一定hô͘ bē tio̍h，心內tio̍h急，soah開嘴大聲hoah：「桃á！你緊來！來chia！來我chia！」Mā m̄知影是天公伯--á有保庇，a̍h是桃á聽有伊ê話，he桃á kài-sêng hō͘ khip鐵khip--過-來 án-ne，ta̍uh-ta̍uh-á流ùi a婆--ā ê seng-khu邊--去，a婆--ā to̍h順順á kā桃á接--起-來，mo͘h--leh人to̍h ùi tú-chiah teh洗衫ê所在--去，驚he桃á khò--tio̍h，koh好禮á kā桃á khǹg tī溪á邊ê石埔á，人to̍h揀1 ê the tio̍h khah sù-sī ê石頭邊歇喘。

人khah無hiah喘了後，a婆--ā開始研究這粒桃á，伊看看--leh，so-so--leh，koh鼻鼻--leh。「看--起-來是桃á，so--起-來是桃á，鼻--起-來mā是桃á，偏偏á to̍h生kah chiah大粒！」衫mā m̄洗--ah，洗好--ê kah無洗--ê lām-lām做1夥，lóng khǹg落去脚桶，koh kā桃á tha̍h起lih衫á褲頂koân，脚桶mo͘h--leh，按算先轉去厝--ni̍h，等in ang婿轉--來chiah koh做夥參詳phah算。

來ê路chiâⁿ近，轉--去ê路kāng款hiah近，to̍h是ke 1粒3尺koân ê大粒桃á，a婆脚桶mo͘h teh行，hit粒桃á koh tú好cha̍h tio̍h目睭，頭殼to̍h ài khi 1-pêng chiah有才調看路，桃á kài重，行無jōa久to̍h喘phēⁿ-phéⁿ，to̍h koh ài kā脚桶khǹg落土脚歇--1-時á，chiah有才調koh繼續行--1-tè-á，沿路án-ne歇幾nā-chōa，到厝ê時，a婆--ā早to̍h喘kah ē kho͘雞bē pûn火，kui seng-khu軟kô-kô，脚痠手chhoah，趕緊kā脚桶khǹg tī門口埕，門開--leh，人to̍h sûi phiaⁿ tī交椅the--leh。心內koh唸1句講：「Aih…，人老真正是bē kham-chit操…。」
--
Hosting provided by SoundOn