概要
講趣味ê台語，做趣味ê代誌，【狡怪囡仔古】是做工á人工作室製作ê全新單元，歡迎收聽【白蔥á公主】，真ló͘-la̍t，真感謝。
[Podcast]
SoundOn
https://bit.ly/ChKaL_SO
Spotify
https://spoti.fi/48jD2tI
KKBOX Podcast
https://bit.ly/ChKaL_KK
Apple Podcast
https://apple.co/3HZyfD3
YouTube Podcast
https://bit.ly/ChKaL_YT
[社交平台 Siā-kau Pêⁿ-tâi]
YouTube
https://bit.ly/ChKaL_YT
Facebook
https://bit.ly/ChKaL_FB
Instagram
https://www.instagram.com/chokangalang/
X (Twitter)
https://twitter.com/chokangalang
方格子
https://vocus.cc/salon/cho-kang-a-lang
以下內容是漢羅kah pe̍h-ōe-jī原稿，有需要歡迎ta̍k-ke來參考。
【漢羅版】
入城了後，紅帽á少女ná行ná紹介chit ê國家，伊有去講tio̍h chit ê國家ê國王，伊ê第2 ê後生，號做白馬王子。Chit ê王子伊足gâu舞劍，劍術chiâⁿ厲害，只要伊手頭有劍，to̍h無人有伊法，而且伊尪á頭koh生了chiâⁿ súi，自細漢，大人若看tio̍h伊，定定忍bē牢，捻伊ê嘴phóe，講伊足緣投。Tī王宮內，定定有啥物阿姨--ā，姑婆--ā，甚至是官員ê某，ta̍k家攏相爭beh捻伊ê嘴phóe，hō͘伊感覺足siān。總--是，mā bē-tàng劍拔--出-來to̍h凊彩kâng phut。有時伊穿便服出巡，行tī街á頭，mā 1工到暗去tú tio̍h m̄-bat ê阿桑，ó͘，一直beh紹介in查某孫hō͘伊熟似neh。To̍h因為án-ne，chit ê緣投ê王子，愈來愈無ài kah人鬥陣，過生日ê時，伊to̍h騎伊hit隻白馬，出去趖規工，騎kah馬強beh thèⁿ腿。若是過年，伊無想beh kah人請安交陪，to̍h推講下腳手人歇睏，無人通替伊洗馬，伊會家己走去kā馬á洗身軀，透早洗kah透暗，直直洗，一直洗，洗到hit隻馬phah kha-chhiùⁿ兼liù皮，看tio̍h水to̍h驚，過3工閣m̄敢lim水。Mā因為伊無愛kah人鬥陣，規工m̄是teh舞劍，to̍h是teh舞伊ê馬，m̄-chiah會hông叫做白馬王子。
紅帽á少女講tio̍h緣投á桑to̍h興chhih-chhih，se̍h-se̍h-liām，講bē soah，白蔥á公主是tī邊--á嘴nōa chha̍p-chha̍p-tin，m̄是teh siàu想hit ê緣投ê王子，伊kan-na注神teh鼻好食物ê芳味。紅帽á少女紹介伊chit ê城市上有代表性ê好食物----肉圓。「Hit pêng hit 2擔，1擔leh賣炊ê肉圓，1擔leh賣chìⁿ ê肉圓，2擔攏蓋好食，你beh揀tó 1擔？」
「Gín-á人m̄-chiah tio̍h揀，我行情敢hiah bái？我2款攏beh！」
白蔥á公主嘴--ni̍h that 1粒肉圓，tng leh哺ê時，看tio̍h邊--á壁頂，貼1張海報，ĕ？Chit ê查某人哪會看--起-來面熟面熟？紅帽á少女講：「Hit ê是hông通緝ê歹人，若是掠tio̍h人，警察賞金20萬--ō͘！」
白蔥á公主詳細ka看，「Ĕ？Chit ê人to̍h是gún後母--ā！」紅帽á少女chhoah 1 tiô，看hit張海報講：「真--ê a̍h假--ê？Án-ne咱緊來去報警察！」Oa̍t頭soah發見，aih-iò͘，伊哪會是teh hâm 1 ê生份人講話？Hit ê人khiā teh伊身軀邊，嘴koh teh哺檳榔。Ah公主--leh？哪會走無--去？原來咱白蔥á公主，2種肉圓sut了了，liam-mi to̍h趖去chhōe別項物件食--ah，根本to̍h閣kā伊放bē記。
因為幾偌工無se̍h街--ah，白蔥á公主一直se̍h，一直買，一直食，食kah真歡喜，伊閣想講：「M̄-m̀，gún矮á猴哥哥hoⁿh，一定m̄-bat lim過真珠奶茶，我若是買轉去hō͘ in lim，in一定會足歡喜。」
伊to̍h去買奶茶，算好好1人1杯，kōaⁿ kah重khoâiⁿ-khoâiⁿ。伊閣想講：「規氣今á日暗頓食較chheⁿ-chhau--leh，雖罔我bē曉煮食，m̄-koh火鍋應該hâm泡麵差不多，煮ho͘熟to̍h好。」伊to̍h開始買材料，愈買愈濟款，後--來真正kōaⁿ bē去，規氣--à kā hit寡奶茶，攏總灌了了。到天beh暗ê時，伊chiah家己chhōe tio̍h路通轉去別莊。Chit táu買tio̍h chiâⁿ濟高級ê食材，龍蝦、海膽、刺五加，攏總ka下下--入-去，無teh計較成本，閣kā 8粒市內上有名ê肉圓，khǹg-khǹg--入-去。咱chit ê公主hoⁿh，足搭心，伊閣會記eh ta̍k ê人愛食ê物件o͘h，蒜頭，芋á，芫荽，mā攏總kā伊參--入-去，sòa--lòe閣gia̍h 1支大支湯匙tī hia烏白lā，lā kah 1鼎火鍋，變kah有夠thái-ko，閣有1 ê hiàn走--出-來，佳哉使用--ê攏是上chhiⁿ--ê高級料，he矮á猴7兄弟hoⁿh，一世人to̍h m̄-bat食過chiah-nī-á特別ê料理，食kah是真歡喜。顛倒是白蔥á公主，hit頓無hâm in做夥食，伊講伊下晡食siuⁿ飽，家己坐tī邊--á teh gè俗pháng。
咱閣轉來講王宮chit pêng，白蔥á公主出去辦代誌，辦kah無khoàiⁿ影，王后感覺真滿意，尤其是hit ê殺手，攏無來chhōe家己討賬尾，想--tio̍h伊to̍h笑微微。想bē到chiah過無幾工，竟然koh看tio̍h公主ê消息，伊ê迷眾頁閣有新ê相片，伊竟然teh渡假！Ĕ？Chit間別莊看--起-來哪會chiah面熟？王后認出hit張相片內底ê別莊，to̍h是進前有人檢舉，講是teh樹林á內底，有人侵佔國有地，tī hia起ê別莊。Chit聲害--ā，伊chhōe人去刣公主，公主若無死，代誌piak-khang是beh án怎？伊趕緊kā進前人檢舉備案ê hit份報告péng--出-來，chhōe tio̍h hit間別莊ê位，想講：「Chhōe外包--ê實在bē信用--得，代誌若beh做ho͘好勢，猶是tio̍h ài家己來！」
王后先去倉庫，家己貯1籃á蘋果，閣特別揀1粒較大粒較水--ê，the̍h轉去房間，kā毒藥抹tī hit粒蘋果頂頭，khǹg teh邊--á lāng風，sòa--lòe家己chng kah親像1 ê老大人，驚án-ne閣去hō͘白蔥á公主認--出-來，伊閣專工tī鼻頭點1粒痣，目睭尾閣畫1 tah斑。王后chhiau出伊衫á櫥內底上舊--ê hit su烏色ê洋裝，ka擲teh土腳，踏踏--leh，伊本底是想beh hō͘ hit su洋裝看--起-來較lah-sap，踏kah腳有淡薄á酸，才想tio̍h講，ah！烏色本底to̍h較看bē出hiong--ā。王后準備好勢，to̍h kā hit籃蘋果kōaⁿ--leh，ùi城堡ê後門出--去。
白蔥á公主睏到中晝，起床teh等紅帽á少女，chit時，khok khok khok！有人teh撞門。
「有人tī--leh-無？」
「來--ā！咱tó位beh chhōe？」
門phah開，是1 ê穿烏衫ê阿婆，笑微微徛tī hia。
「Hĕ？看你規身軀穿kah烏mà-mà，蓋成阮後母neh。」
聽tio̍h公主án-ne講，hit ê阿婆緊張kah，應講：「你…，你mài烏白講，我哪有親像伊hiah水！」
阿婆趕緊比家己ê鼻á講：「你看，伊kám有chit粒痣？」擱比目睭尾，「你看，伊kám有chit tah斑？」
白蔥á公主想想--leh，án-ne講mā有影，to̍h問hit ê阿婆：「Ah你哪會無代無誌走來chia，chia是無網路信號--ê ŏ͘。」
阿婆kā籃á蓋掀--開，1籃蘋果紅kì-kì閣芳貢貢，伊kā hit粒有毒ê蘋果the̍h--出-來，tu去公主面頭前，講：「我來賣蘋果--ê-lah，來，chit粒請你食。」
公主看tio̍h面頭前chit粒chiah-nī-á大粒ê蘋果，愛睏神攏走無--去，目睭thí kah大大蕊，講：「Ŏa-à，看--起-來足好食款！」
伊伸手beh去接hit粒蘋果，阿婆歡喜kah嘴角翹翹，想bē到chit ê時陣，白蔥á公主soah講：「M̄-koh chit粒看--起-來siuⁿ過分，我ài較脆--ê。」
話猶未講soah，伊to̍h直接伸手ùi籃á內底捎另外1粒khiaih食。阿婆猶未放棄，講：「Chit粒mā真芳，你食看māi！」白蔥á公主無ka應，閣家己揀另外1粒khiaih食，無teh kah伊客氣。
「我拜託--你，chit粒先食看māi--lah！」阿婆一直kā伊手tēⁿ--leh hit粒蘋果，tu去白蔥á公主面頭前，公主應講：「你是m̄甘hō͘我食o͘h？」伊1手捎1粒蘋果ùi嘴--ni̍h塞，soah去kê--tio̍h。阿婆去ho͘驚1 tiô，規ê籃á lak teh土腳。
「Ah！Beh án怎beh án怎，hit ê há-muh li̍p去啥--ê beh án怎創….ĕ？我chhap-chhap伊去死！」
白蔥á公主倒teh土腳，chhoah--1-ē，chhoah--1-ē，to̍h無閣再振動--ah。阿婆伸指頭á ka thuh 2下，「Eh！ 喂！」看公主死giān-giān攏無反應，歡喜kah笑hai-hai，人to̍h隨走--去。
矮á猴兄弟轉到厝，看tio̍h公主倒teh土腳，bē振bē動，看--起-來蓋成死--去-ah，in足m̄甘，哭kah足大聲。
「白蔥á公主無--去-ah，以後咱食bē tio̍h chheⁿ-chhau--ê-a。」
「我beh食火鍋--lah…。」
In哭1分鐘了後，to̍h開始討論beh án-nóa處理公主ê代誌。
「橫直咱上gâu--ê tio̍h是挖孔--ā，咱挖1 ê窟á kā伊tâi--起-來。」
「Bē-sái！公主請咱食好料--neh，chiah-nī-á偉大ê人，哪會使凊彩ka埋？」
最後in決定beh做1 ê玻璃罩，kā白蔥á公主裝teh內底，chhāi tī客廳通ta̍k工ka拜。
閣講轉來2工進前，因為有報馬á提供情報，白馬王子to̍h受命去追查通緝犯。雖罔伊m̄是警察，但是伊ē-tàng利用外交身分去進行調查，伊騎馬入去樹林á內底，想bē到chhōa路機ka烏白亂報，行到手機á攏無信號，伊soah chhōe無路。這時拄好看tio̍h矮á猴ê別莊，伊去撞門想beh問路，撞規晡久攏無人應。白馬王子ùi窗á門ka看--入-去，看tio̍h 1 ê玻璃罩，內底閣倒1 ê水姑娘á。王子m̄知發生啥物代誌，伊to̍h ùi窗á門跳--入-去。看tio̍h桌頂khǹg 1塊俗pháng，伊腹肚iau，想講無人khoàiⁿ，to̍h kā俗pháng捎起來食。白馬王子ná食ná行到白蔥á公主邊--á，心內想講m̄知伊是做啥物歹代誌，哪會hō͘人chhāi tī chia。
Chit時拄好矮á猴兄弟轉到厝，in kāng款bih tī外口看，細細聲á討論講：「哪會又閣有生份人來tī咱兜？」
「閣hâm公主kāng款，凊彩the̍h咱ê物件食！」
「Lín看外口hit隻白馬，kám講伊是….」
「白賊！」
「To̍h kā你講白賊m̄是chit ê意思--lah！」
「等--leh等--leh，lín ka看！」
In看tio̍h hit ê生份人愈倚愈近，伸手kā白蔥á公主ê玻璃罩掀--開，矮á猴兄弟看kah有淡薄á緊張，m̄知伊是想beh創啥？
白馬王子感覺chit ê查某gín-á ká-ná閣teh喘氣，伊倚去查某gín-á ê面hia，想beh確認--1-ē。Chit ê時陣，hit ê查某gín-á雄雄目睭peh金，1嘴蘋果to̍h án-ne吐teh伊ê面！
「食siuⁿ緊，血糖雄雄chhèng懸，soah睏--去-ah。M̆？你是siáng？你kám是beh來kā我搶蘋果--ê？蘋果--leh？我hit籃蘋果--leh？」
Chit ê時陣，矮á猴兄弟chông--入-來，1陣人kā白馬王子圍--起-來，王子想講，chit ê場面伊bat聽--過，che是仙人跳，che一定是仙人跳！
【Pe̍h-ōe-jī pán】
Ji̍p-siâⁿ liáu-āu, Âng-bō-á siàu-lú ná kiâⁿ ná siāu-kài chit ê kok-ka, i ū khì kóng tio̍h chit ê kok-ka ê kok-ông, i ê tē 2 ê hāu-seⁿ, hō-chò Pe̍h-bé-ông-chú, chit ê ông-chú i chiok gâu bú-kiàm, kiàm-su̍t chiâⁿ lī-hāi, chí-iàu i chhiú-thâu ū kiàm, to̍h bô lâng ū i hoat, jî-chhiáⁿ i ang-á-thâu koh seⁿ liáu chiâⁿ súi, chū sè-hàn, tōa-lâng nā khòaⁿ tio̍h i, tiāⁿ-tiāⁿ jím-bē-tiâu, liàm i ê chhùi-phóe, kóng i chiok iân-tâu. Tī ông-kiong lāi, tiāⁿ-tiāⁿ ū siáⁿ-mih a-î--ā, ko͘-pô--ā, sīm-chì sī koaⁿ-oân ê bó͘, ta̍k-ke lóng sio-cheⁿ beh liàm i ê chhùi-phóe, hō͘ i kám-kak chiok siān. Chóng--sī, mā bē-tàng kiàm poe̍h--chhut-lâi to̍h chhìn-chhái kâng phut. Ū sî i chhēng piān-ho̍k chhut-sûn, kiâⁿ tī ke-á-thâu, mā 1 kang kàu àm khì tú tio̍h m̄-bat ê a-sáng, ó͘, it-ti̍t beh siāu-kài in cha-bó͘-sun hō͘ i se̍k-sāi neh. To̍h in-ūi án-ne, chit ê iân-tâu ê ông-chú, jú lâi jú bô ài kah lâng tàu-tīn, kòe seⁿ-ji̍t ê sî, i to̍h khiâ i hit chiah pe̍h-bé, chhut-khì sô kui-kang, khiâ kah bé kiōng-beh thèⁿ-thúi. Nā sī kòe-nî, i bô siūⁿ beh kah lâng chhéng-an kau-pôe, to̍h the kóng ē-kha-chhiú-lâng hioh-khùn, bô lâng thang thè i sé bé, i ē ka-tī cháu-khì kā bé-á sé seng-khu, thàu-chá sé kah thàu-àm, ti̍t-ti̍t sé, it-ti̍t sé, sé kàu hit chiah bé phah kha-chhiùⁿ kiam liù-phôe, khòaⁿ tio̍h chúi to̍h kiaⁿ, kòe 3 kang koh m̄-káⁿ lim chúi. Mā in-ūi i bô ài kah lâng tàu-tīn, kui-kang m̄-sī teh bú-kiàm, to̍h sī teh bú i ê bé, m̄-chiah ē hông kiò chò Pe̍h-bé-ông-chú.
Âng-bō-á siàu-lú kóng tio̍h iân-tâu-á-sàng to̍h hèng-chhih-chhih, se̍h-se̍h-liām, kóng bē soah, Pe̍h-chhang-á kong-chú sī tī piⁿ--á chhùi-nōa chha̍p-chha̍p-tin, m̄-sī teh siàu-siūⁿ hit ê iân-tâu ê ông-chú, i kan-na chù-sîn teh phīⁿ hó chia̍h-mi̍h ê phang-bī. Âng-bō-á siàu-lú siāu-kài i chit ê siâⁿ-chhī siōng ū tāi-piáu sèng ê hó chia̍h-mi̍h “Bah-oân”. “Hit pêng hit 2 tàⁿ, 1 tàⁿ leh bē chhoe ê bah-oân, 1 tàⁿ leh bē chìⁿ ê bah-oân, 2 tàⁿ lóng kài hó-chia̍h, lí beh kéng tó 1 tàⁿ?”
“Gín-á lâng m̄-chiah tio̍h kéng, góa hâng-chêng kám hiah bái? Góa 2 khoán lóng beh!”
Pe̍h-chhang-á kong-chú chhùi--ni̍h that 1 lia̍p bah-oân, tng leh pō͘ ê sî, khòaⁿ tio̍h piⁿ--á piah-téng, tah 1 tiuⁿ hái-pò, ĕ? Chit ê cha-bó͘-lâng nah ē khòaⁿ--khí-lâi bīn-se̍k bīn-se̍k? Âng-bō-á siàu-lú kóng: “Hit ê sī hông thong-chi̍p ê pháiⁿ-lâng, nā sī lia̍h tio̍h lâng, kéng-chhat siúⁿ-kim 20 bān--ō͘!”
Pe̍h-chhang-á kong-chú siông-sè ka khòaⁿ, “Ĕ? Chit ê lâng to̍h sī gún āu-bú--ā!” Âng-bō-á siàu-lú chhoah 1 tiô, khòaⁿ hit tiuⁿ hái-pò kóng: “Chin--ê a̍h ké--ê? Án-ne lán kín lâi-khì pò kéng-chhat!” Oa̍t-thâu soah hoat-kiàn, ai-ioh, i nah ē sī teh hâm 1 ê chheⁿ-hūn-lâng kóng-ōe? Hit ê lâng khiā teh i seng-khu piⁿ, chhùi koh teh pō͘ pin-nn̂g. Ah kong-chú--leh? Nah ē cháu bô--khì? Goân-lâi lán Pe̍h-chhang-á kong-chú, 2 chióng bah-oân sut liáu-liáu, liam-mi to̍h sô khì chhōe pa̍t-hāng mi̍h-kiāⁿ chia̍h--ah, kin-pún to̍h koh kā i pàng bē-kì.
In-ūi kúi-nā-kang bô se̍h-ke--ah, Pe̍h-chhang-á kong-chú it-ti̍t se̍h, it-ti̍t bé, it-ti̍t chia̍h, chia̍h kah chin hoaⁿ-hí, i koh siūⁿ kóng: “M̄-m̀, gún É-á-kâu ko-ko hoⁿh, it-tēng m̄-bat lim kòe chin-chu-leng-tê, góa nā sī bé tńg-khì hō͘ in lim, in it-tēng ē chiok hoaⁿ-hí.”
I to̍h khì bé leng-tê, sǹg hó-hó 1 lâng 1 poe, kōaⁿ kah tāng-khoâiⁿ-khoâiⁿ. I koh siūⁿ kóng: “Kui-khì kin-á-ji̍t àm-tǹg chia̍h khah chheⁿ-chhau--leh, sui-bóng góa bē-hiáu chú-chia̍h, m̄-koh hóe-ko èng-kai hâm phàu-mī chha-put-to, chú ho͘ se̍k to̍h hó.” I to̍h khai-sí bé châi-liāu, jú bé jú chē khoán, āu--lâi chin-chiàⁿ kōaⁿ bē khì, kui-khì--à kā hit kóa leng-tê, lóng-chóng koàn liáu-liáu. Kàu thiⁿ beh àm ê sî, i chiah ka-tī chhōe tio̍h lō͘ thang tńg-khì pia̍t-chong. Chit táu bé tio̍h chiâⁿ chē ko-kip ê si̍t-châi, liông-hê, hái-táⁿ, chhì-ngó͘-ka, lóng-chóng ka hē-hē--ji̍p-khì, bô teh kè-kàu sêng-pún, koh kā 8 lia̍p chhī-lāi siōng ū miâ ê bah-oân, khǹg-khńg--ji̍p-khì. Lán chit ê kong-chú hoⁿh, chiok tah-sim, i koh ē kì eh ta̍k ê lâng ài chia̍h ê mi̍h-kiāⁿ o͘h, soàn-thâu, ō͘-á, iân-sui, mā lóng-chóng kā i chham--ji̍p-khì, sòa--lòe koh gia̍h 1 ki tōa-ki thng-sî tī hia o͘-pe̍h lā, lā kah 1 tiáⁿ hóe-ko, piàn kah ū kàu thái-ko, koh ū 1 ê hiàn cháu--chhut-lâi, ka-chài sú-iōng--ê lóng sī siōng chhiⁿ--ê ko-kip liāu, he É-á-kâu 7 hiaⁿ-tī hoⁿh, chi̍t-sì-lâng to̍h m̄-bat chia̍h kòe chiah-nī-á te̍k-pia̍t ê liāu-lí, chia̍h kah sī chin hoaⁿ-hí. Tian-tò sī Pe̍h-chhang-á kong-chú, hit tǹg bô hâm in chò-hóe chia̍h, i kóng i e-po͘ chia̍h siuⁿ pá, ka-tī chē tī piⁿ--á teh gè sio̍k-pháng.
Lán koh tńg-lâi kóng ông-kiong chit pêng, Pe̍h-chhang-á kong-chú chhut-khì pān tāi-chì, pān kah bô khoàiⁿ iáⁿ, ông-hiō kám-kak chin boán-ì, iû-kî sī hit ê sat-chhiú, lóng bô lâi chhōe ka-tī thó siàu-bóe, siūⁿ--tio̍h i to̍h chhiò-bi-bi. Siūⁿ bē kàu chiah kòe bô kúi-kang, kèng-jiân koh khòaⁿ tio̍h kong-chú ê siau-sit, i ê bê-chiòng-ia̍h koh ū sin ê siòng-phìⁿ, i kèng-jiân teh tō͘-kà! Ĕ? Chit keng pia̍t-chong khòaⁿ--khí-lâi nah ē chiah bīn-se̍k? Ông-hiō jīn-chhut hit tiuⁿ siòng-phìⁿ lāi-té ê pia̍t-chong, to̍h sī chìn-chêng ū lâng kiám-kí, kóng sī teh chhiū-nâ-á lāi-té, ū lâng chhim-chiàm kok-iú tē, tī hia khí ê pia̍t-chong. Chit siaⁿ hāi--ā, i chhōe lâng khì thâi kong-chú, kong-chú nā bô sí, tāi-chì piak-khang sī beh án-chóaⁿ? I kóaⁿ-kín kā chìn-chêng lâng kiám-kí pī-àn ê hit hūn pò-kò péng--chhut-lâi, chhōe tio̍h hit keng pia̍t-chong ê ūi, siūⁿ kóng: “Chhōe gōa-pau--ê si̍t-chāi bē sìn-iōng--tit, tāi-chì nā beh chò ho͘ hó-sè,iáu sī tio̍h ài ka-tī lâi!”
Ông-hiō seng-khì chhng-khò͘, ka-tī té 1 nâ-á phōng-kó, koh te̍k-pia̍t kéng 1 lia̍p khah tōa lia̍p khah súi--ê, the̍h tńg-khì pâng-keng, kā to̍k-io̍h boah tī hit lia̍p phōng-kó téng-thâu, khǹg teh piⁿ--á lāng-hong, sòa--lòe ka-tī chng kah chhin-chhiūⁿ 1 ê lāu-tōa-lâng, kiaⁿ án-ne koh khì hō͘ Pe̍h-chhang-á kong-chú kong-chú jīn--chhut-lâi, i koh choan-kang tī phīⁿ-thâu tiám 1 lia̍p kì, ba̍k-chiu-bóe koh ōe 1 tah pan. Ông-hiō chhiau chhut i saⁿ-á-tû lāi-té siōng kū--ê hit su o͘-sek ê iûⁿ-chong, ka tàn teh thô͘-kha, ta̍h-ta̍h--leh, i pún-té sī siūⁿ beh hō͘ hit su iûⁿ-chong khòaⁿ--khí-lâi khah lah-sap, ta̍h kah kha ū tām-po̍h-á sng, chiah siūⁿ tio̍h kóng o͘-sek pún-té to̍h khah khòaⁿ bē chhut hiong--ā. Ông-hiō chún-pī hó-sè, to̍h kā hit nâ phōng-kó kōaⁿ--leh, ùi siâⁿ-pó ê āu-mn̂g chhut--khì.
Pe̍h-chhang-á kong-chú khùn kàu tiong-tàu, khí-chhn̂g teh tán Âng-bō-á siàu-lú, chit-sî, khok khok khok! Ū lâng teh lòng-mn̂g.
“Ū lâng tī--leh-bô?”
“Lâi--ā! Lán tó-ūi beh chhōe?”
Mn̂g phah khui, sī 1 ê chhēng o͘-saⁿ ê a-pô, chhiò-bi-bi khiā tī hia.
“Hĕ? Khòaⁿ lí kui seng-khu chhēng kah o͘-mà-mà, kài sêng goán āu-bú neh.”
Thiaⁿ tio̍h kong-chú án-ne kóng, hit ê a-pô kín-tiuⁿ kah, ìn kóng: “Lí…, lí mài o͘-pe̍h kóng, góa nah ū chhin-chhiūⁿ i hiah súi!”
A-pô kóaⁿ-kín pí ka-tī ê phīⁿ-á kóng: “Lí khòaⁿ, i kám ū chit lia̍p kì?” Koh pí ba̍k-chiu-bóe, “Lí khòaⁿ, i kám ū chit tah pan?”
Pe̍h-chhang-á kong-chú siūⁿ siūⁿ--leh, án-ne kóng mā ū-iáⁿ, to̍h mn̄g hit ê a-pô: “Ah lí nah ē bô-tāi-bô-chì cháu lâi chia, chia sī bô bāng-lō͘ sìn-hō--ê ŏ͘.”
A-pô kā nâ-á kòa hian--khui, 1 nâ phōng-kó âng-kì-kì koh phang-kòng-kòng, i kā hit lia̍p ū to̍k ê phōng-kó the̍h--chhut-lâi, tu khì kong-chú bīn-thâu-chêng, kóng: “Góa lâi bē phōng-kó--ê-lah, lâi, chit lia̍p chhiáⁿ lí chia̍h.”
Kong-chú khòaⁿ tio̍h bīn-thâu-chêng chit lia̍p chiah-nī-á tōa-lia̍p ê phōng-kó, ài-khùn-sîn lóng cháu-bô--khì, ba̍k-chiu thí kah tŏa-tōa lúi, kóng: “Ŏa-à, khòaⁿ--khí-lâi chiok hó-chia̍h khoán!”
I chhun-chhiú beh khì chiap hit lia̍p phōng-kó, a-pô hoaⁿ-hí kah chhùi-kak khiàu-khiàu, siūⁿ bē kàu chit ê sî-chūn, Pe̍h-chhang-á kong-chú soah kóng: “M̄-koh chit lia̍p khòaⁿ--khí-lâi siuⁿ kòe-hun, góa ài khah chhè--ê.”
Ōe iáu-bōe kóng soah, i to̍h ti̍t-chiap chhun-chhiú ùi nâ-á lāi-té sa lēng-gōa 1 lia̍p khiaih chia̍h. A-pô iáu-bōe hòng-khì, kóng: “Chit lia̍p mā chin phang, lí chia̍h khòaⁿ-māi!”
Pe̍h-chhang-á kong-chú bô ka ìn, koh ka-tī kéng lēng-gōa 1 lia̍p khiaih chia̍h, bô teh kah i kheh-khì.
“Góa pài-thok--lí, chit lia̍p seng chia̍h khòaⁿ-māi--lah!”
A-pô it-ti̍t kā i chhiú tēⁿ--leh hit lia̍p phōng-kó, tu khì Pe̍h-chhang-á kong-chú bīn-thâu-chêng, kong-chú ìn kóng: “Lí sī m̄-kam hō͘ góa chia̍h o͘h?” I 1 chhiú sa 1 lia̍p phōng-kó ùi chhùi--ni̍h that, soah khì kê--tio̍h. A-pô khì ho͘ kiaⁿ 1 tiô, kui-ê nâ-á lak teh thô͘-kha.
“Ah! Beh án-chóaⁿ beh án-chóaⁿ, hit ê há-muh li̍p khì siáⁿ--ê beh án-chóaⁿ chhòng…ĕ? Góa chhap-chhap i khì sí!”
Pe̍h-chhang-á kong-chú tó teh thô͘-kha, chhoah--1-ē, chhoah--1-ē to̍h bô koh chài tín-tāng--ah. A-pô chhun chéng-thâu-á ka thuh 2 ē, “Eh! Oeh!” Khòaⁿ kong-chú sí-giān-giān lóng bô hoán-èng, hoaⁿ-hí kah chhiò-hai-hai, lâng to̍h sûi cháu--khì.
É-á-kâu hiaⁿ-tī tńg-kàu chhù, khòaⁿ tio̍h kong-chú tó teh thô͘-kha, bē-tín-bē-tāng, khòaⁿ--khí-lâi kài sêng sí--khì-ah, in chiok m̄-kam, khàu kah chiok tōa-siaⁿ.
“Pe̍h-chhang-á kong-chú bô--khì-ah, í-āu lán chia̍h bē tio̍h chheⁿ-chhau--ê-a.”
“Góa beh chia̍h hóe-ko--lah….”
In khàu 1 hun-cheng liáu-āu, to̍h khai-sí thó-lūn beh án-nóa chhú-lí kong-chú ê tāi-chì.
“Hûiⁿ-ti̍t lán siōng gâu--ê tio̍h sī ó͘-khang--ā, lán ó͘ 1 ê khut-á kā i tâi--khí-lâi.”
“Bē-sái! Kong-chú chhiáⁿ lán chia̍h hó-liāu--neh, chiah-nī-á úi-tāi ê lâng, nah ē-sái chhìn-chhái ka tâi?”
Chòe-āu in koat-tēng beh chò 1 ê po-lê-tà, kā Pe̍h-chhang-á kong-chú chng teh lāi-té, chhāi tī kheh-thiaⁿ thang ta̍k-kang ka pài.
Koh kóng tńg-lâi 2 kang chìn-chêng, in-ūi ū pò͘-bé-á thê-kiong chêng-pò, Pe̍h-bé-ông-chú to̍h siū-bēng khì tui-cha thong-chi̍p hoān. Sui-bóng i m̄-sī kéng-chhat, tān-sī i ē-tàng lī-iōng gōa-kau sin-hūn khì chìn-hêng tiau-cha, i khiâ-bé ji̍p-khì chhiū-nâ-á lāi-té, siūⁿ bē kàu chhōa-lō͘-ki ka o͘-pe̍h loān pò, kiâⁿ kàu chhiú-ki-á lóng bô sìn-hō, i soah chhōe bô lō͘. Chit sî tú-hó khòaⁿ tio̍h É-á-kâu ê pia̍t-chong, i khì lòng-mn̂g siūⁿ beh mn̄g-lō͘, lòng kui po͘ kú lóng bô lâng ìn. Pe̍h-bé-ông-chú ùi thang-á-mn̂g ka khòaⁿ--ji̍p-khì, khòaⁿ tio̍h 1 ê po-lê-tà, lāi-té koh tó 1 ê súi ko͘-niû-á, ông-chú m̄-chai hoat-seng siáⁿ-mih tāi-chì, i to̍h ùi thang-á-mn̂g thiàu--ji̍p-khì. Khòaⁿ tio̍h toh-téng khǹg 1 tè sio̍k-pháng, i pak-tó͘ iau, siūⁿ kóng bô lâng khoàiⁿ, to̍h kā sio̍k-pháng sa khí-lâi chia̍h. Pe̍h-bé-ông-chú ná chia̍h ná kiâⁿ kàu Pe̍h-chhang-á kong-chú piⁿ--á, sim-lāi siūⁿ kóng m̄-chai i sī chò siáⁿ-mih pháiⁿ tāi-chì, nah ē ho͘ lâng chhāi tī chia.
Chit sî tú-hó É-á-kâu hiaⁿ-tī tńg-kàu chhù, in kāng-khoán bih tī gōa-kháu khòaⁿ, sè-sè-siaⁿ-á thó-lūn kóng: “Nah ē iû-koh ū chheⁿ-hūn-lâng lâi tī lán tau?”
“Koh hâm kong-chú kāng-khoán, chhìn-chhái the̍h lán ê mi̍h-kiāⁿ chia̍h!”
“Lín khòaⁿ gōa-kháu hit chiah pe̍h-bé, kám kóng i sī…”
“Pe̍h-chha̍t!”
“To̍h kā lí kóng pe̍h-chha̍t m̄-sī chit ê ì-sù--lah!”
Tán--leh tán--leh, lín ka khòaⁿ!”
In khòaⁿ tio̍h hit ê chheⁿ-hūn-lâng jú óa jú kīn, chhun-chhiú kā Pe̍h-chhang-á kong-chú ê po-lê-tà hian--khui, É-á-kâu hiaⁿ-tī khòaⁿ kah ū tām-po̍h-á kín-tiuⁿ, m̄-chai i sī siūⁿ beh chhòng-siáⁿ?
Pe̍h-bé-ông-chú kám-kak chit ê cha-bó͘-gín-á ká-ná koh teh chhoán-khùi, i óa khì cha-bó͘-gín-á ê bīn hia, siūⁿ beh khak-jīn--1-ē. Chit ê sî-chūn, hit ê cha-bó͘-gín-á hiông-hiông ba̍k-chiu peh kim, 1 chhùi phōng-kó to̍h án-ne thò͘ teh i ê bīn.
“Chia̍h siuⁿ kín, hoeh-thn̂g hiông-hiông chhèng-koân, soah khùn--khì-ah. M̆? Lí sī siáng? Lí kám sī beh lâi kā góa chhiúⁿ phōng-kó--ê? Phōng-kó--leh? Góa hit nâ phōng-kó--leh?”
Chit ê sî-chūn, É-á-kâu hiaⁿ-tī chông--ji̍p-lâi, 1 tīn lâng kā Pe̍h-bé-ông-chú ûi--khí-lâi, ông-chú siūⁿ kóng, chit ê tiûⁿ-bīn i bat thiaⁿ--kòe, che sī sian-jîn-thiàu, che it-tēng sī sian-jîn-thiàu!
--
Hosting provided by SoundOn