本集介紹

*特別收錄

永遠的臺灣島：寫予竹內昭太郎先生

獅頭山頂，天清雲薄；七星嶺上，菅草雺霧
臺北州四界遨，大稻埕好𨑨迌
你是灣生，思念晟養你的母親
永遠的臺灣島

昭和20年5月31，戰雲對天邊鳴金擊鼓而來
幾若百隻美軍B24轟炸機，
共臺北州城掔甲頭眩目暗，炮火連天
袂輸草蜢仔大軍的戰魔，青面齴牙，兵臨城頂
予人強欲袂喘氣的戰火，𧿬踏本成萬里無雲的城市

高校拄才入學的學徒兵隨參加一場
無偌熟似的祖國愛你拍的戰爭
險險玉碎當欲奢颺的18歲的青春
欶一喙武士牌的紙薰，敢會成做正港的武士？
切腹，嘛無法度證明咱流的是仝款的血
臺灣神社火燒厝，無才調守護這个皇軍霸占的島嶼
新高山恬恬懸懸徛佇遐
總督府予炸彈磅甲去一半
生離死別，朝代轉踅，伊攏看佇目睭底
若像表參道的明治橋，迒過淡淡清幽的基隆河
臺灣神宮佇圓山仔頂懸哀聲嘆惜

花開花謝，節氣變換；無得定的戰火繼續湠
草山挖防空壕的日子，懵懂少年時淡薄仔的稀微
逐工愛唱的溫柔校歌，變調做無奈出征的戰曲
七星寮看過去的山邊紅霞，染做美軍擲落來的無情戰火
南門口恬靜堅持的城牆，陪伴你行過偌濟灣生的青春
植物園荷花池邊的蟲豸，敢猶會記得你的心聲
大世界館的電影一幕一幕咧重搬
草山眾樂園的硫磺味，小可仔𣻸𣻸又閣溫暖的記持
西門市場八角堂，早就妝娗做紅樓入夢中
崛川道路月色炤光的南國之夜
Drigo小夜曲響起的河堤草埔
敕使街道行七擺，嘛袂當坐清你的情懷

紅色的日頭已經落山
四箍輾轉陷入烏暗的眠夢
天皇無條件投降的詔文透濫冷冷的山風
吹過心酸的門口埕
投降矣！大日本帝國不敗的神話破滅矣！
玉音放送，魩仔魚食鮕鮘的大東亞戰爭煞鼓
八紘一宇的神國幻影嘛全然破碎
在地抾額的兵仔營除隊，你的靈魂嘛得著疏開引揚佮安慰
共參戰的五摠頭剃清氣，頭鬃埋入厝前的木瓜樹跤
安葬走縒的青春，嘛鉸掉不義的戰爭
這片土地本底就毋是恁的
勇敢共臺灣還予臺灣人，才是大和民族的尊嚴

古亭菜市仔邊一六軒的弓蕉牛奶糖，滋味難忘的喙食物
太平町丸公園路邊擔仔的米粉湯，
規世人攏會記得的古早味
榮町光食堂的枝仔冰，gàn喙齒閣透心涼
東門町二條通的配給米，並啥物攏較芳甜
士林的「防空壕小姐」聽講徙去水道町某番地
通學路裡相拄毋捌請問芳名的「臺北小姐」是走去佗位？
投降、除隊、疏開、引揚，你是欲轉去佗一个高天原？
臺灣敢毋是你出世徛起的所在？

新店溪，海鳥千風；紫色山茶花，文文的笑容
四分之一世紀25年的久別重逢
「南國ラジオ」的音樂又閣響起，
敢若美玲姊仔的叮嚀佮吩咐
囡仔伴姿碧小姐的日語早就生鉎，
你的臺灣話舊底就袂輾轉
歡喜寫佇鬢邊，感動刻佇眼神；
噗噗惝的心跳千言萬語斷半字

再會啦圓山仔、大稻埕；再會啦竹仔湖、舊草山
觀音山䖙踮關渡淡水河出海口遠遠的所在
就予戰爭的亡魂崁魂佇連綿的大屯山裡
無論雷公爍爁，風雨交加，烏雲密布
伊是咱的母親，上媠的島嶼
永遠的臺灣島

留言告訴我你對這一集的想法： https://open.firstory.me/user/clzkwp8750bwo01tk9ndc27fn/comments

Powered by Firstory Hosting