Description

簡單紹介A郎故事內底有講--tio̍h ê語詞，ǹg望各位聽眾朋友聽了ē kah意，nā感覺bē-bái，mā真歡迎kā goán tàu紹介hō͘親chiâⁿ朋友ō͘。

[Podcast]

SoundOn
https://bit.ly/ChKaL_SO

Spotify
https://spoti.fi/48jD2tI

KKBOX Podcast
https://bit.ly/ChKaL_KK

Apple Podcast
https://apple.co/3HZyfD3

[社交平台 Siā-kau Pêⁿ-tâi]

Facebook
https://bit.ly/ChKaL_FB

Instagram
https://www.instagram.com/chokangalang/

X (Twitter)
https://twitter.com/chokangalang

以下內容是漢羅kah白話字原稿，有需要歡迎ta̍k-ke來參考。

【漢羅版】

今á日beh來hâm各位研究ê詞是行踏，像咱故事所講--tio̍h ê，「ài加減á出門行踏」，to̍h是ài去sì-kè行行看看--leh，m̄好kui kang khut tī厝，khut久ē死痠，身體精神lóng bē好。

Nā講，伊真久無來咱chia行踏--ah，che當然mā有來行行--leh ê意思，m̄-koh m̄-nā是án-ne，tī chia，行踏koh有來kah咱交陪、往來ê意思，咱koh ke用1 ê例來說明，ta̍k-ê凡勢ē jú有體會。「伊平常時a̍h無來leh hâm咱行踏，chit-má需要人tàu-saⁿ-kāng，chiah來 leh a伯a-ḿ，實在是無想beh chhap--伊。」

行踏mā有leh講人leh行ê形，像講，「伊éng過bat傷tio̍h脚，koh來行踏to̍h無kài自然。」咱nā聽tio̍h人án-ne講，凡勢ē-tàng想tio̍h有1 ê人行路pái--leh pái--leh án-ne。

最後行踏mā ē-sái講人ê品行，咱ē-tàng講人行踏真端正，a̍h是講行踏無正經，總--是，人ê行踏ē受伊所交陪ê朋友來影響。

【Pe̍h-ōe-jī pán】

Kin-á-ji̍t beh lâi hâm kok-ūi gián-kiù ê sû sī kiâⁿ-ta̍h, chhiūⁿ lán kò͘-sū só͘ kóng--tio̍h ê, “ài ke-kiám-á chhut-mn̂g kiâⁿ-ta̍h”, to̍h sī ài khì sì-kè kiâⁿ-kiâⁿ khòaⁿ-khòaⁿ--leh, m̄-hó kui kang khut tī chhù, khut kú ē sí-sng, sin-thé cheng-sîn lóng bē hó.

Nā kóng, i chin kú bô lâi lán chia kiâⁿ-ta̍h--ah, che tong-jiân mā ū lâi kiâⁿ-kiâⁿ--leh ê ì-sù, m̄-koh m̄-nā sī án-ne, tī chia, kiâⁿ-ta̍h koh ū lâi kah lán kau-pôe, óng-lâi ê ì-sù, lán koh ke iōng 1 ê lē lâi soat-bêng, ta̍k-ê hoān-sè ē jú ū thé-hōe. “I pêng-siông sî a̍h bô lâi leh hâm lán kiâⁿ-ta̍h, chit-má su-iàu lâng tàu-saⁿ-kāng, chiah lâi leh a-peh a-ḿ, si̍t-chāi sī bô siūⁿ beh chhap--i.”

Kiâⁿ-ta̍h mā ū leh kóng lâng leh kiâⁿ ê hêng, chhiūⁿ-kóng, “I éng-kòe bat siong tio̍h kha, koh lâi kiâⁿ-ta̍h to̍h bô kài chū-jiân.” Lán nā thiaⁿ tio̍h lâng án-ne kóng, hoān-sè ē-tàng siūⁿ tio̍h ū 1 ê lâng kiâⁿ-lō͘ pái--leh pái--leh án-ne.

Chòe-āu kiâⁿ-ta̍h mā ē-sái kóng lâng ê phín-hēng, lán ē-tàng kóng lâng kiâⁿ-ta̍h chin toan-chèng, a̍h-sī kóng kiâⁿ-ta̍h bô chèng-keng, chóng--sī, lâng ê kiâⁿ-ta̍h ē siū i só͘ kau-pôe ê pêng-iú lâi éng-hióng.
--
Hosting provided by SoundOn