Description

臺語現代詩-EP.2福爾摩沙的風景之二

黃湘雅老師朗讀

6.後山山茄石∕林益彰
7.宜蘭本色∕林榮淑
8.愛․河∕古能豪
9.看大甲溪∕余文欽
10.鹿港出征∕凍露水

拜別了觀音山，《臺語現代詩》的第二集收錄有林益彰、林榮淑、古能豪、余文欽、凍露水等五位老師的作品， 這次我們將一同到那後山山茄石，追尋太平洋古老的聲音。

6.後山山茄石/林益彰

袂輸青草的心跳聲，
反掀鐵花村底，
彼充滿早前芳味的冊字，
使定佇大道的翼股，
會使閣再拄著，拄著，
太平洋久無影著的音曲，
彼就若山茄石所恬靜的祈禱。
咱就看矣，後山的性命，
本是海洋的目睭，
鄉塗的跤跡實腹的面圖；
咱就聽矣，有陣會曉言語的揹仔，
徛佇舊月台寄話，
猶原飽水少年家的心內話，
彼是欲向踅角轉彎的耳空邊，
會當齊陣敨開中央山底，
彼遍若空色水撒掖的，
行徙刻印的寬容-馴馴溫溫。

7.宜蘭本色/林榮淑

雪山山脈牽手中央山脈 挾持
媠噹噹的蘭陽溪
百萬年情歌對喙
相逐調唱

歌聲一路無停，踏著音階層層相連紲
裙裾沿路幌搖，裝置地景藝術相重疊

山地
河谷
山跤沖積平原
低濕帶
湳地
海岸帶/沙崙
空色太平洋

Formosa 東北角 一隻起帆畚箕號
玄天上帝差遣龜蛇守護
噶瑪蘭族 泰雅族 歸鄉人 過客生湠沉思

獨一無二，宜蘭腔口光榮的名牌，真不二價
價值連城，宜蘭經驗政客的課本，自用送人
誠實城市，友善宜蘭旅客典藏名產，遠近馳名
面海背山，幸福宜蘭船員夢中情人，生生世世

8.愛․河/古能豪

愛，用四百幾冬的時間聊聊仔寫著河的美麗
河，用幾代人的夢想寬寬仔畫畫出愛的風景
愛，用城市的記持紀錄著河的一切演變
河，用高雄人的目屎洗掉愛的部份滄桑
愛，用三暝三日講袂完河對伊的思戀
河，用伊豐富的內才𤆬愛開枝閣散葉
愛，用深深的思念將河的皺紋慢慢仔熨平
河，用妖嬌的姿勢將愛的流域勻勻仔湠開
愛，用濟濟打狗的故事演出河的百年夢想
河，用五花十色的手法引起愛的火焰著火
愛，用迷人的聲音演奏著母親河進行曲
河，用溫柔的跤步予高雄人的愛代代傳
愛，覕佇河中孵岫
河，伊佇愛中出世

9.看大甲溪/余文欽

大甲溪水潺潺流過
無相辭
山頂的雲追落來
絶情呀綿綿仔長
地頭白冷佮天冷嘛叫寒

菅芒花織好棉績被
佇邊仔等
伊也毋捌搝來蓋
日光月光照頭照尾
嘛臆袂著啥物咧相等

想講龍安橋做玉帶
將溪腰縖起來
牽伊上岸
用詩歌來伴伊媠媠的歌聲
日日夜夜
互相攏袂孤單

10.鹿港出征/凍露水

毋驚運命的審判 相辭原鄉袂畏寒
毋驚海湧有偌大 我佇心內有咒誓

出世八字袂當選 人生敢著愛周全
意志堅定下大願 踏湧浮漂來台灣

鹿港的風熱情招呼阮
離別的海口 予阮初戀的溫純
鬧熱的廟埕 安慰無定的心悶
阮堅心欲佇遮釘根
再會啦 無聊多情的黃昏

鹿港的船已經無地看
美麗的田岸 永遠佮阮來做伴
寂寞的舊街 囝孫世代遮生湠
阮一生一世攏袂換
誠心向望 你永遠是阮的心肝

退色的紅厝瓦 消失的孤帆影
壁角的應公爺 兇狂的炮仔聲

思念的心情 深深有咱的痛
阮是出外的鹿港兄 阮的母親是鹿港城

Powered by Firstory Hosting