Description

〈阿郎〉是一個從鄉下地方展開的冒險故事。住在農村的阿公阿婆，十幾年來一直過著平平靜靜的日子。沒想到，有一天阿婆在小溪邊洗衣服的時候，竟然遇到了一件非常怪異的事情，從那時起，阿公阿婆的生活便產生了巨大的改變。到底發生了什麼樣的事情呢？這就要請大家親身來了解了！


訂閱做工á人Youtube頻道：https://www.youtube.com/@chokangalang
完整ê漢羅／POJ對照文稿khǹg ti官方網站：https://cho-kang-a-lang.github.io/


【漢羅版】
轉來到厝，詳細kā所聽ê tāi-chì講hō͘ pē-bú聽，堅心beh去南島phah歹人。A婆講：「Che生理人，1 ki嘴hô͘-lùi-lùi，事實kám真正是án-ne？」A郎應講：「伊無tāi無chì kā我騙beh創siáⁿ？」A公koh講：「Che南島路途hiah tiàu-oán，你連隔壁庄to無去--過，beh到南島to̍h盤山過嶺neh，hiah遠ê路途實在hō͘人bē放心！Mài hiah硬khì--lah！」老公婆1人1句，不管án-chóaⁿ ko͘-chiâⁿ，少年人to̍h是少年人，kài chhóng-pōng，beh去to̍h是beh去，sian講to̍h m̄聽。A婆看án-chóaⁿ苦勸lóng無效，想講「Aih，橫直gín-á大漢mā tio̍h ài出外ke行行看看--leh，ke bat kóa tāi-chì。」To̍h講：「好--lah，你nā堅心beh去，mā tio̍h準備好勢chiah出門！」A公--a是tiām-tiām lóng m̄講話…。A婆kā a公hiu--leh，2 ê人to̍h去準備A郎出外beh chah ê行李--ah。

3 kang後天tú phah-phú-á光，A郎行李lóng chhoân好勢，今á日to̍h beh出門，2 ê老公婆tng leh交帶A郎出外ài注意ê tāi-chì。衫á褲kah 1 kóa細項mi̍h用1條大條ê包袱巾á包包--leh做1包。Koh有1 ê草á色ê kha-báng，四角四角，有2條帶á，用雙肩phāiⁿ，頂面koh用o͘色kah白色ê漆，「Ū Bô It」3 ê大字寫kah整齊整齊，a公講che是伊少年ê時四界去賣chu̍t米丸á leh phāiⁿ--ê，內底是in老公婆chit 3日準備好ê chu̍t米丸á，講che丸á kài要緊，吩咐A郎一定ài好禮á對待，iau thang食，koh ē有其他ê路用。A郎問chit ê「Ū Bô It」是siáⁿ-mih意思，a公解說講是「Nā我koh ū teh賣丸á，bô人káⁿ講伊ê丸á是第it」chit lō意思，m̄-koh siuⁿ長，簡單寫「Ū Bô It」代表to̍h好。

A郎kha-báng phāiⁿ--leh，包袱á手the̍h--leh，木刀插tī腰帶，kā pē-bú辭別，人to̍h起行。老公婆m̄甘，phōaⁿ A郎做夥行。A婆是直直交帶出外ài注意ê mê-mê角角，嘴lóng無停睏，a公--a kāng款lóng無講話，kan-na知影thang流目屎，一直送到庄外大路，A郎停脚，請pē-bú mài koh送。3 ê人khiā tī 大路邊繼續話，A婆繼續kā iáu-bē交帶了--ê繼續交帶，交帶soah，準備beh轉厝。Chiah看tio̍h a公koh khiā tī hia m̄走，kan-na流目屎，講：「好--ah-lah！To m̄是leh嫁chŏ͘-kiáⁿ！Gín-á大漢mā是to̍h ài去外口看看--leh！」A公chit時chiah應：「To 5歲niâ，siáⁿ-mih大漢！」 A婆應講：「Án-ne歹看--lah！」Koh kā A郎kóng：「出門在外，不比tī厝，凡事細jī，ài ē-hiáu顧ka-tī！」A公--a ka拖--leh，to̍h ùi厝轉--去。A郎tùi大路行--去。行1-tè-á，koh聽tio̍h lāu-pē tī遠遠ê所在teh喝：「A郎，A郎…。」Ûn-ná鼻頭酸酸目kho͘紅紅，m̄-koh ài去南島phah歹人，kha步khah重mā tio̍h繼續行。自án-ne，A郎ê旅行開始--lo͘h。

A郎直直行，一直行，ùi透早行kah中晝，koh ùi中晝行到beh暗á，nā感覺thiám to̍h tī樹á-ńg下kha歇，精神khah好to̍h koh起行，iau to̍h食pē-bú chhoân ê丸á，一直行kah kiōng beh看無路chiah chhōe 1 ê kah意ê所在過暝，柴火起好，蓆á chhu好，倒--leh準備beh睏。看天頂滿天星金sih-sih，soah開始思念厝--ni̍h ê pē-bú，m̄知in好--無，m̄-koh人iā真thiám，真緊to̍h睏落眠。

第2 kang ûn-ná天光to̍h起行，kāng款行kui日ê路，行kah日頭落山倒--leh beh睏。今á日beh睏ê時kāng款teh sim-būn pē-bú，koh想che路m̄知koh ài行jōa久，to̍h ài chhōe伴做陣行，有人thang做伴，路--ni̍h有人thang開講，路途ē khah輕鬆，mā有人thang sio照顧。

Tē 3 kang，A郎kāng款順大路繼續行，行到1 ê小山崙，peh起lih無jōa久to̍h是樹林á，大路thàng過樹林一直去。A郎講：「Óa，Chia chit tè路有ńg，免pha̍k日，súi--lah！」心內歡喜脚步mā輕鬆。行無jōa久，hiông-hiông聽tio̍h 1 ê軟kauh-kauh ê聲，koh注心ka聽，tang-sî-á是有人teh出聲！「有人--無？Kám是有人？救人o͘h！」A郎聽聲chhiau-chhōe，看tio̍h 1 ê人倒teh khah頭前ê樹á脚teh喝救人。A郎三步做一步行，趕到hit ê人seng-khu邊，問講：「你是án-chóaⁿ？Nah ē倒tī chia？有要緊--無？」生份人應講：「我iau kah無khùi力thang行，你kám有mi̍h-kiāⁿ thang hō͘我止iau？」「有，有，你小等--leh！」A郎緊ùi kha-báng內底the̍h chu̍t米丸á出來ho͘食。「食khah慢--leh，m̄-thang cha̍k--tio̍h，chia有茶thang hō͘你phòe。」茶罐á mā the̍h出來chhāi tī伊邊--á。生分人講1句多謝，丸á緊接過來食，iau過頭--ā，食siuⁿ hiông，mā是食kah cha̍k--tio̍h，1手tǹg胸坎，1手the̍h茶罐á大嘴灌茶。Án-ne連sòa食4，5粒了後，thó͘ 1 kháu大khùi，人mā ke真有氣力，真滿足ê形，嘴笑目笑kā A郎講：「眞ló͘-la̍t，nā m̄是tn̄g tio̍h你來救，凡勢我to̍h iau死tī路邊！請問恩人án-chóaⁿ稱呼？」「免細jī，人kah人互相tàu-saⁿ-kāng是應該，我叫A郎，請問你án-chóaⁿ稱呼？」「我叫A明，in lóng叫我山頂烏狗兄。」
--
Hosting provided by SoundOn