概要
這集是為了幫准考試們打氣！ . 又到了考試的季節，除了幫我們的准考生打氣，我還會分享當年我抗壓失敗的原因-想太多，而準備考試時候的壞習慣甚至影響我到現在。 . . 文字版： 2019到2020年對於大部分香港學生來說，真是無比艱難的一個學年，尤其是要準備公開試的中學生們。一場疫情徹底打亂了所有人的陣腳。老師教唔切啲syllabus, 學生讀唔切啲書，有啲學生仲有幫屋企周圍撲口罩。我有啲做朋友嘅老師，佢地宜家都好頭痕，要設計網上直播教學，又要照顧屋企唔洗返學嘅小朋友，真係分身都唔得掂。不過我覺得最忙可能係IT老師，要解答埋其他老師網上直播嘅時候會遇到嘅IT問題。 唔係每個同學仔嘅屋企環境都適合溫書，我自己比較好彩，屋企比較靜同埋屋企人都好就我，知道我要溫書都會較細聲啲電視機聲。其他無咁好彩嘅就要出去自修室溫書，但係疫情下好多圖書館嘅自修室都關咗，就算有坊間嘅自修室或者coffee shop可以用，同學仔出去都無咁安心，同埋出去仲要消耗一個口罩呢~ 所以如果聽緊嘅你地，屋企如果有人需要溫書嘅，無論係咪dse都好，都盡量配合下，較細聲啲啲電視機聲，體諒下讀書人真係好慘嫁~ 回想自己考公開試都已經係幾年前嘅事，如果你宜家問我，覺得公開試重要嗎？ 我會問翻你：呢個問題係咪真係咁重要？ 如果我答你重要，你係咪就會即刻熄電話通宵溫書；如果我答你唔重要，你係咪就會燒曬啲notes走去打機。 我當年考嘅係dse，已經唔係考會考A-level。雖然不及今年階備試生咁狼狽，但係當年因為係會考轉dse嘅過渡期，依然會有好多唔清晰嘅指引。尤其係操卷嘅時候，因為無之前嘅試卷可以作參考，唔似會考已經舉行咗好多年，你可以搵到好多舊嘅試卷操題目。嗰時我哋同老師其實都一樣好焦慮，唔知到底會出啲咩類型嘅試題，唔知難度會去到咩level，總之就好多未知。 我當年真係十級討厭讀書，所以面對dse真係厭惡至極。我講我讀屎片書係一啲都無呃你地，不過我暫時未夠膽自爆公開試成績住哈！當時我壓力非常非常大，因為全世界都同我講dse一試定終生，我心諗我啲咁嘅成績，係咪完試便往生。 我當時壓力大到狂甩頭髮，兩邊頭髮越嚟越禿，仲生埋蛇。 因為記性唔好記唔住啲formula等等，我為咗更加好利用時間，我連訓教都係度背書，因為習慣訓教背書不停用腦，導致我宜家大腦不懂休息，形成失眠。 話說，我一直覺得考試其實就係考記憶力。 公開試真係只不過係一個checkpoint, 絕對唔會一試定終生，但係你又唔好天真到以為你公開試結果對你未來人生一啲影響都無。你後來入到咩學院，遇到嘅人同資源都會對你以後人生嘅路有唔同程度嘅啟發。你肯定覺得我係度講廢話，其實唔係咯！你可以做嘅就係唔好諗太多，淨係同我專心去背熟啲formula！a2 - b2 = (a+b)(a-b)!! 其實唔好諗太多係咩意思呢，一啲容易焦慮嘅同學仔好難去高度集中溫習眼前筆記，當他們溫溫下書嘅時候，時不時嗰腦就會不停聯想自己如果考衰咗會點，係咪就要周圍撲學校，係咪就要出嚟打工無書讀，係咪呢樣嗰樣。企圖利用呢啲恐怖嘅場景逼自己溫書。其實你只會越諗越驚，然後你就可能陷入一種焦慮，自責，恐慌，無力嘅旋渦入面。當時我就係如此，不停諗自己如果入唔到名校，係咪就乞食，乞食就買唔到樓，買唔到樓就訓街~係咁放大呢啲根本未發生嘅嘢。於是我嘅溫習效率極其低，同埋極其逃避溫書。所以同學仔都可以自己反思下自己係咪都有呢個壞習慣出現。 其實以前邊度識呢啲嘢，係後來入大學考試溫書嘅時候，不停思考點解宜家考試壓力無以前咁大，發現好似就係因為無人同我講大學嘅試係一試定終生，唔定終生我腦海就無咁多無無謂謂嘅聯想，注意力更加集中，溫書更加輕鬆。輕鬆唔係講緊我溫得好容易，甚至去到得心應手嘅程度，我都有擔心自己會唔會fail甚至retake。 所以我梳理翻成個過程自己之所以抗壓失敗，就係我太相信dse係一試定終生，而呢樣嘢係其他人話我知。咁啱我又唔係一個讀書叻嘅人，所以係成個學習過程我都俾自己好大壓力，將考試失敗嘅結果諗到有咁壞得咁壞，企圖用自我恐嚇嘅方式逼自己讀書，結果令到自己跌入一個惡性循環，我越諗越驚，越驚就越逃避。 DSE考試成績都係我意料之內，有聽我第一集嘅朋友仔都知道我係讀屎片書嘅乖學生，但係我想講，我都係一個擁有5**成績嘅屎片書考生，就是中文寫作。但係畢業之後我就無再寫作，再次提筆認真寫文已經係我宜家經營podcast打稿嘅時候。再次寫作，最大感受就係，好惋惜我嘅寫作能力大不如前。明明自己曾經係好喜歡寫作嘅人，因為庸碌嘅生活，日日拖住無靈魂嘅身體返工放工，都無再去認真去紀錄生活，應該係根本無生活俾我紀錄。慢慢本來已經無乜方向嘅我，更加迷失自己。 宜家嘅我開始有翻啲感覺。 無咩啊~非名牌大學畢業，放棄低薪薄職，隻身一人踏上podcast呢條不歸路。借podcast繼續抒發厭世睇法，又可以寫下文，唔再自怨自艾，唔再輕視自己個人小小嘅影響力，利用podcast幫下其他人。只要有一個人肯聽我嘅節目，只要有人發現我節目仲有一點點嘅價值，只要你唔嫌棄我把聲，我都會做落去~ 所以考生們，未來大把路俾你揀。 各位准考生盡力而為，加油啦！ . Track: Sunflower — Soyb [Audio Library Release] Music provided by Audio Library Plus Watch: youtu.be/dG1U3NuR9Pk Free Download / Stream: alplus.io/sunflower
Come chat with me:)
- Patreon Support
- Website
- Instagram
- Payme花茶支持
Powered by Firstory Hosting