本集介紹

簡單紹介A郎故事內底有講--tio̍h ê語詞，ǹg望各位聽眾朋友聽了ē kah意，nā感覺bē-bái，mā真歡迎kā goán tàu紹介hō͘親chiâⁿ朋友ō͘。

[網站 Bāng-chām]
https://cho-kang-a-lang.github.io/

[Podcast]

SoundOn
https://bit.ly/ChKaL_SO

Spotify
https://spoti.fi/48jD2tI

KKBOX Podcast
https://bit.ly/ChKaL_KK

Apple Podcast
https://apple.co/3HZyfD3

Google Podcasts
https://ppt.cc/fpPKUx

YouTube Podcast
https://bit.ly/ChKaL_YT


[社交平台 Siā-kau Pêⁿ-tâi]

YouTube
https://bit.ly/ChKaL_YT

Facebook
https://bit.ly/ChKaL_FB

Instagram
https://www.instagram.com/chokangalang/

X (Twitter)
https://twitter.com/chokangalang

方格子
https://vocus.cc/salon/cho-kang-a-lang


以下內容是漢羅kah白話字原稿，有需要歡迎ta̍k-ke來參考。

【漢羅版】
今á日beh紹介ê語詞是khăn-jió͘，khêng實像chit款詞，是tī日本時代，台語kah日語sio thàu-lām ê產物，有1 kóa日語內底有，m̄-koh台語內底無--ê，chŏaⁿ直接kā日本話the̍h入來台語講，吸收做台語ê 1部分。Tī chia ē-sái講幾ê例，凡勢ta̍k-ke mā有聽--過，親像siat-chuh，hăn-tó͘-luh，khăm-páng chit種--ê，lóng算是日來詞。

Chit款話，tī goán hit iân ê人koh tiāⁿ-tiāⁿ有leh講，m̄-koh，凡勢是ē-hiáu講日語ê老輩--ê漸漸無--去，chit kóa語詞mā jú來愈罕得聽--tio̍h，só͘-pái，chit-má chià chit ê機會koh來kā ta̍k-ke紹介--1-ē。

話koh講倒 --轉-來，chit ê khăn-jió͘ nā tī故事內底所講--ê，「Nah ē hiah緊to̍h去ho͘ khăn-jió͘--去！」Tī chia，是解決、完成ê意思，to̍h是leh講白話字nah ē hiah好學，A郎sûi to̍h學ē-hiáu。

Koh另外1 ê意思，to̍h是leh講人已經過身--a，但是，nā用khăn-jió͘ chit塊詞，hit ê人一定m̄是咱kài親近ê人，凡勢咱koh ē感覺hit ê人kài顧人怨，屬tī害á hit款--ê，用khăn-jió͘來講khah無hiah尊重。話ē-sái án-ne講，「你講A林á--o͘h？前1 chām-á kah人冤家，去hông khăn-jió͘--去-ah。」


【Pe̍h-ōe-jī pán】

Kin-á-ji̍t beh siāu-kài ê gí-sû sī khăn-jió͘, khêng-si̍t chhiūⁿ chit khoán sû, sī tī Ji̍t-pún sî-tāi, Tâi-gí kah Ji̍t-gí sio thàu-lām ê sán-bu̍t, ū 1 kóa Ji̍t-gí lāi-té ū, m̄-koh Tâi-gí lāi-té bô--ê, chŏaⁿ ti̍t-chiap kā Ji̍t-pún-ōe the̍h ji̍p-lâi Tâi-gí kóng, khip-siu chò Tâi-gí ê 1 pō͘-hūn. Tī chia ē-sái kóng kúi ê lē, hoān-sè ta̍k-ke mā ū thiaⁿ--kòe, chhin-chhiūⁿ siat-chut, hăn-tó͘-luh, khăm-páng chit chióng--ê, lóng sǹg sī Ji̍t-lâi-sû.


Chit khoán ōe, tī goán hit iân ê lâng koh tiāⁿ tiāⁿ ū leh kóng, m̄-koh, hoān-sè sī ē-hiáu kóng Ji̍t-gí ê lāu-pòe--ê chiām-chiām bô--khì, chit kóa gí-sû mā jú lâi jú hán-tit thiaⁿ--tio̍h, só͘-pái, chit-má chià chit ê ki-hōe koh lâi kā ta̍k-ke siāu-kài--1-ē.


Ōe koh kóng tò --tńg-lâi, chit ê khăn-jió͘ nā tī kò͘-sū lāi-té só͘ kóng--ê, “Nah ē hiah kín to̍h khì ho͘ khăn-jió͘--khì!” Tī chia, sī kái-koat, oân-sêng ê ì-sù, to̍h sī leh kóng pe̍h-ōe-jī nah ē hiah hó o̍h, A-lông sûi to̍h o̍h ē-hiáu.


Koh lēng-gōa 1 ê ì-sù, to̍h sī leh kóng lâng í-keng kòe-sin--a, tān-sī, nā iōng khăn-jió͘ chit tè sû, hit ê lâng it-tēng m̄-sī lán kài chhin-kīn ê lâng, hoān-sè lán koh ē kám-kak hit ê lâng kài kò͘-lâng-oàn, sio̍k tī hāi-á hit khoán--ê, iōng khăn-jió͘ lâi kóng khah bô hiah chun-tiōng. Ōe ē-sái án-ne kóng, “Lí kóng A-lîm-á--o͘h? Chêng 1 chām-á kah lâng oan-ke, khì hông khăn-jió͘--khì-ah.”
--
Hosting provided by SoundOn