本集介紹

A郎ê冒險故事，希望ta̍k-ke聽tio̍h ē kah意，mā真ǹg望ta̍k-ke鬥紹介hō͘親chiâⁿ朋友做夥來聽故事！

[官方網站 Koaⁿ-hong bāng-chām]
https://cho-kang-a-lang.github.io/

[Podcast]

SoundOn
https://bit.ly/ChKaL_SO

Spotify
https://spoti.fi/48jD2tI

KKBOX Podcast
https://bit.ly/ChKaL_KK

Apple Podcast
https://apple.co/3HZyfD3

Google Podcasts
https://ppt.cc/fpPKUx

YouTube Podcast
https://bit.ly/ChKaL_YT


[社交平台 Siā-kau Pêⁿ-tâi]

YouTube
https://bit.ly/ChKaL_YT

Facebook
https://bit.ly/ChKaL_FB

Instagram
https://www.instagram.com/chokangalang/

X (Twitter)
https://twitter.com/chokangalang

方格子
https://vocus.cc/salon/cho-kang-a-lang

以下是故事ê漢羅kah白話字原稿，有需要ē-tàng參考。

【漢羅版】
3 ê人沿路開講沿路行，A郎問講：「雉雞姊，看你嘴笑目笑，心情bē-bái hōⁿ？」應講：「Hèⁿ ā！Hâm lín做夥旅行，kài sêng koh轉去到少年時無煩無惱ê日子，goán爸母早早to̍h過身，我真早to̍h ài phāiⁿ hit間店ê責任。觀前顧後，看頭看尾，項項mā tio̍h斟酌。」A明接落去講：「莫怪你chit-má表情hiah輕鬆！」雉雞姊koh應講：「是ā，iáu koh好順祥chêng goán爸母過身，to̍h一直tī我seng-khu邊tàu-sio-kēng，mā是有伊，我chit-má chiah走ē開脚。Lín koh來叫我A鳳to̍h好，he是我ê本名。」A明問講：「Án-chóaⁿ ē有雉雞chit ê偏名？」應講：「我gín-á時，飼1 chiah雉雞，真súi，kui kang to tòe前tòe後，真乖。歹gín-á nā beh kā我kāng，伊to̍h ē去ka啄，久--來，開始有人叫我雉雞，koh來to̍h hông叫tiâu--leh-ah。」A郎笑笑講：「白目gín-á hông tok應該。」Chiū án-ne kui路笑聲無停。
Koh án-ne繼續順大路一直行--落-去，4 kang後，3 ê人來到1 phiàn闊bóng-bóng ê平洋，草hoat kah真旺，有1 tīn鹿á tī草埔á teh食草，tú好chah--出-來ê食mi̍h mā食kah差不多，A明講：「咱tio̍h phah 1隻鹿á來食，順sòa mā做1 kóa肉干，後1 ê庄頭m̄知koh ài jōa遠chiah ē到，hō͘我chit ê軍師來想看有siáⁿ-mih妙計--bô，ta̍k ê sió等--1-ē。」話猶未講soah，A郎木刀已經poe̍h--出-來，準備beh衝過去phah鹿á。Chit chūn，A鳳soah tī路邊khioh 1粒圓圓ê石頭，雙手ka so-so--leh，tēⁿ-tēⁿ--leh，koh用手sìm--leh sìm--leh chat輕重，到伊感覺滿意，正手kā石頭tēⁿ ho͘ tiâu，bún笑--1-ē，kéng 1隻鹿á，siòng ho͘真真，sòa--落-來倒脚gia̍h koân過頭，ùi hit隻鹿á ê方向，大步出力 hiòng前緊mé踏--出-去，正手mā tòe脚步踏hiòng前ê勢，ná 1條鞭tùi鹿á sut--出-去，一直sut到盡磅，石頭離手，ná箭離弦，ná暝時流過天邊ê流星，tī空中畫1 chōa真súi ê khiok線，準準khian tio̍h鹿á頭，鹿á ê頭殼tòe leh hàiⁿ--1-ē，seng-khu khi 1 pêng，phiăng--1-ē，直直倒tī土脚bē-tín-bē-tāng，A郎看kah嘴á開開bē曉合，A明mā看kah m̄知影thang想妙計。

其實石頭離手ê時，A鳳已經知影石頭ē án-chóaⁿ飛，che是m̄知已經練習過幾千遍chiah調整到完美ê動作，kah hit年熱--人hit球離手ê感覺lóng sio-siāng。完美ê投球，siāng蹧躂人ê球路，目睭tòe bē tio̍h ê球速，無tè嫌ê 1球。球khian--出-去，歡喜kah，心內喝講「穩--ah」，無張無tî，「khng」1聲，球飛kah koh koân koh遠。Hit年ê熱天，對A鳳來講，to̍h án-ne結束--ah。
Phah tio̍h鹿á了後，3 ê人分工無閒，抾柴起火，剝皮，處理鹿á肉，一直到黃昏，無時停ê khang-khòe chiah結束，3 ê人chiah有閒kang thang圍tī火邊食暗。暗頓是鹿á肉kah腹內khòng菜蔬ê湯，3 ê人ná o-ló好食ná開講，A鳳mā ta̍uh-ta̍uh-á kā A郎in講伊phah鹿á ê工夫是án-chóaⁿ ē-hiáu--ê。Tang-sî-á是A鳳--ā in庄--ni̍h，ta̍k年熱--人神明seⁿ，to̍h ài ngiâ鬧熱，神明ē繞境保庇四方信徒，消災解厄。人人ài備辦好酒好菜敬拜神明。Mā m̄知是tang時開始，有人建議ài辦野球比賽，講是beh hō͘節日koh khah鬧熱，che比賽有限制是15 kàu 17歲ê少年gín-á chiah ē-tàng參加，to̍h是為tio̍h beh鼓勵gín-á-lâng訓練體能，尾--á，庄--ni̍h ta̍k ê真認同，野球比賽變kah chiok時行，家家戶戶lóng真熱情參與，nā厝--ni̍h有夠歲ê gín-á，to̍h ē送in去球隊練球。頭起先人無夠，kan-na ē-tàng hun做2隊phah，尾--á，jú來jú chē人來參與，變做8隊，比賽mā變做ài比3 kang，ta̍k隊to想beh piàⁿ頭名。「教練看我球khian了bē-bái，選我做投手，15歲hit年，the̍h tio̍h第4名，16 the̍h tio̍h第3名，到我17 hit年，想beh piàⁿ冠軍，練球練kah無暝無日，結果mā是the̍h tio̍h第2名niâ…。」A鳳teh講chit段往事ê時，有時嘴笑目笑，有時sàm淡稀微，凡勢che to̍h是青春ê滋味。
3 ê人ná食ná配話，hi-hi-hōa-hōa，心情輕鬆，tú tio̍h--á to̍h ài斟酌hang肉干ê火，溫度ài有夠koh bē-tàng siuⁿ iām。A鳳講：「咱鹿角mā ē-tàng chah--leh，到後1 ê庄頭ē-tàng the̍h去賣，凡勢nā chhōe tio̍h工夫老到ê司傅，koh ē-tàng請伊khek薰吹，刻1 ki A鳳ê鹿角薰吹來pûn風。」等到ta̍k ê食飽家私款好勢，to̍h chhun肉干ài koh顧，thèng-hāu肉干處理好，時間已經kài òaⁿ，3 ê人chiah soah鼓去睏。

隔轉kang 3 ê人kāng款一直順大路行--落-去，to̍h án-ne iû-koh過3日。第4 kang行到beh晝á，開始鼻tio̍h海風鹹鹹ê味，3 ê人知影已經離海邊kài近，斟酌ka看，頭前mā看tio̍h都市，應該脚步koh sió chhui--1-ē to̍h thang好chhōe tio̍h客店歇睏。行--leh行--leh，無jōa久to̍h行到位。去kâng探聽了後，知影chit ê都市號做港都，在地ê人主要是出海lia̍h魚，賣魚，行船載貨做進出口，koh有鹹水貨ê大小賣，市內三脚步一坎店，kài chē間店lóng有kha-siàu tī店門口teh喝聲kho͘人客，人客nā óa--過，mā隨有kha-siàu過來chih-chiap招呼，實在真鬧熱。

3 ê人第1遍來到港都，當然mā是chia看hia看，項項hòⁿ-hiân，件件sĭn-sián，in想想--leh，kui-khì好好á ka觀光--1-ē，sńg ho͘夠khùi chiah phah算，3 ê人to̍h án-ne一直到se̍h，se̍h kah thiám--ah，chiah開始感覺腹肚iau。A鳳講：「Tú-chiah看--tio̍h ê hit間海產餐廳人客插插插，無咱來去ka交關--1-ē siáⁿ款？」A明真緊張，趕緊講：「Ài ē記得先問價siàu！」A鳳應講：「免驚--lah，我請！Mài煩惱！」A郎kah A明koh想tio̍h進前tī A鳳hia做工tú siàu ê tāi-chì，心內歹勢歹勢，m̄敢應好，khiā--leh無tín-tāng，A鳳koh chhui，2 ê人chiah gī--leh gī--leh tòe A鳳後壁行。餐廳出菜kài緊，料理ê手路mā真講究，無jōa久3 ê人to̍h食kah飽thong-thong，有影是料理好食，人客chiah ē chē kah that倒街！食飽，A鳳講：「時間mā òaⁿ--ah，咱sòa--lòe來chhōe客店過暝，明á日去港邊chhōe看有船thang載咱去南島--無。」2 ê查埔--ê lóng無其他ê意見，tāi-chì to̍h照án-ne行--落-去。

Hoan-tńg-kang，3人去到港邊，插插插四界lóng是船，有貿易船teh chiūⁿ貨落貨--ê，mā有漁船tng靠岸teh落魚貨--ê，mā有客船tng teh kho͘人客beh出港--ê，kui ê港邊無閒chhì-chhà，m̄-koh講--起-來mā kài怪奇，in 3 ê人kui ê港邊ê船頭家問透透，to̍h是無船beh去南島。A郎thó͘ 1 kháu大氣講：「Aih，nah ē án-ne，chhōe無船是ài án-chóaⁿ去？」A鳳應講：「Mài煩惱--lah，咱koh kâng探聽看māi--leh，凡勢to̍h chhōe有步。」Chit時1 ê tī路邊歇睏nah涼食hun ê a伯出聲kā in hiu：「少年--ê，lín kám是beh去南島？」3 ê人聽--tio̍h真歡喜，緊大步行去a伯hia ka請教。A伯講：「聽講南島最近有大歹人，khah bē平靜，he船頭家lóng無ài去，生理人gâu sǹg，驚冒險，nā萬不二衰siâu，家伙to̍h ài賠了了，lín nā是一定ài去，ē-tàng去瘦猴hia kah伊參詳看māi--leh。」3 ê人歡喜kah，總算是有希望，有機會thang chhōe tio̍h船，趕緊問a伯ài án-chóaⁿ去瘦猴hia。A伯講：「去瘦猴hia ê路彎彎oat-oat，我講有路來lín mā聽無路來--lah，kui-khì我chhōa lín來去。」

【Pe̍h-ōe-jī pán】

3 ê lâng iân-lō͘ khai-káng iân-lō͘ kiâⁿ, A-lông mn̄g kóng: “Thī-ke-ché, khòaⁿ lí chhùi-chhiò-ba̍k-chhiò, sim-chêng bē-bái hōⁿ?” Ìn kóng: “Hèⁿ ā! Hâm lín chò-hóe lú-hêng, kài-sêng koh tńg-khì kàu siàu-liân sî bô-hoân-bô-ló ê ji̍t-chí, goán pē-bú chá-chá to̍h kòe-sin, góa chin chá to̍h ài phāiⁿ hit keng tiàm ê chek-jīm. Koan-chêng kò͘-āu, khòaⁿ thâu khòaⁿ bóe, hāng-hāng mā tio̍h chim-chiok.” A-bêng chiap-lo̍h-khì kóng: “Bo̍k-koài lí chit-má piáu-chêng hiah khin-sang!” Thī-ke-ché koh ìn kóng: “Sī ā, iáu koh hó Sūn-siông chêng goán pē-bú kòe-sin, to̍h it-ti̍t tī góa seng-khu piⁿ tàu-sio-kēng, mā sī ū i, góa chit-má chiah cháu ē khui kha. Lín koh lâi kiò góa A-hōng to̍h hó, he sī góa ê pún-miâ.” A-bêng mn̄g kóng: “Án-chóaⁿ ē ū Thī-ke chit ê phian-miâ?” Ìn kóng: “ Góa gín-á sî, chhī 1 chiah thī-ke, chin súi, kui kang to tòe chêng tòe āu, chin koai. Pháiⁿ gín-á nā beh kā góa kāng, i to̍h ē khì ka tok, kú--lâi, khai-sí ū lâng kiò góa Thī-ke, koh lâi to̍h hông kiò tiâu--leh-ah.” A-lông chhiò-chhiò kóng: “Pe̍h-ba̍k gín-á hông tok èng-kai.” Chiū án-ne kui lō͘ chhiò-siaⁿ bô-thêng.

Koh án-ne kè-sio̍k sūn tōa-lō͘ it-ti̍t kiâⁿ--lo̍h-khì, 4 kang āu, 3 ê lâng lâi-kàu 1 phiàn khoah-bóng-bóng ê pêⁿ-iûⁿ, chháu hoat kah chin ōng, ū 1 tīn lo̍k-á tī chháu-po͘-á teh chia̍h chháu, tú hó chah--chhut-lâi ê chia̍h-mi̍h mā chia̍h kah chha-put-to, A-bêng kóng: “Lán tio̍h phah 1 chiah lo̍k-á lâi chia̍h, sūn-sòa mā chò 1 kóa bah-koaⁿ, āu 1 ê chng-thâu m̄-chai koh ài jōa hn̄g chiah ē kàu, hō͘ góa chit ê kun-su lâi siūⁿ khòaⁿ ū siáⁿ-mih biāu-kè--bô, ta̍k ê sió-tán--1-ē.” Ōe iáu-bē kóng soah, A-lông ba̍k-to í-keng poe̍h--chhut-lâi, chún-pī beh chhiong kòe-khì phah lo̍k-á. Chit chūn, A-hōng soah tī lō͘-piⁿ khioh 1 lia̍p îⁿ-îⁿ ê chio̍h-thâu, siang-chhiú ka so-so--leh, tēⁿ-tēⁿ--leh, koh iōng chhiú sìm--leh sìm--leh chat khin-tāng, kàu i kám-kak boán-ì, chiàⁿ-chhiú kā chio̍h-thâu tēⁿ ho͘ tiâu, bún-chhiò--1-ē, kéng 1 chiah lo̍k-á, siòng ho͘ chin-chin, sòa--lo̍h-lâi tò-kha gia̍h koân kòe-thâu, ùi hit chiah lo̍k-á ê hong-hiòng, tōa-pō͘ chhut-la̍t hiòng chêng kín-mé ta̍h--chhut-khì, chiàⁿ-chhiú mā tòe kha-pō͘ ta̍h hiòng-chêng ê sè, ná 1 tiâu piⁿ tùi lo̍k-á sut--chhut-khì, it-ti̍t sut kàu chīn-pōng, chio̍h-thâu lī chhiú, ná chìⁿ lī hiân, ná mê-sî lâu-kòe thiⁿ-piⁿ ê liû-chhiⁿ, tī khong-tiong ōe 1 chōa chin súi ê khiok-sòaⁿ, chún-chún khian tio̍h lo̍k-á thâu,
lo̍k-á ê thâu-khak tòe leh hàiⁿ--1-ē, seng-khu khi 1 pêng, phiăng--1-ē, ti̍t-ti̍t tó tī thô͘-kha bē-tín-bē-tāng,
A-lông khòaⁿ kah chhùi-á khui-khui bē-hiáu ha̍p, A-bêng mā khòaⁿ kah m̄ chai-iáⁿ thang siūⁿ biāu-kè.

Kî-si̍t chio̍h-thâu lī chhiú ê sî, A-hōng í-keng chai-iáⁿ chio̍h-thâu ē án-chóaⁿ poe, che sī m̄-chai í-keng liān-si̍p kòe kúi chheng piàn chiah tiâu-chéng kàu oân-bí ê tōng-chok, kah hit nî joa̍h--lâng hit kiû lī chhiú ê kám-kak lóng sio-siāng. Oân-bí ê tâu-kiû, siāng chau-that lâng ê kiû-lō͘, ba̍k-chiu tòe bē tio̍h ê kiû-sok, bô tè hiâm ê 1 kiû. Kiû khian--chhut-khì, hoaⁿ-hí kah, sim-lāi hoah kóng “Ún--ah”, bô-tiuⁿ-bô-tî, “khng” 1 siaⁿ, kiû poe kah koh koân koh hn̄g. Hit nî ê joa̍h-thiⁿ, tùi A-hōng lâi kóng, to̍h án-ne kiat-sok--ah.

Phah tio̍h lo̍k-á liáu-āu, 3 ê lâng hun-kang bô-êng, khioh-chhâ khí-hóe, pak-phôe, chhú-lí lo̍k-á bah, it-ti̍t kàu hông-hun, bô-sî-thêng ê khang-khòe chiah kiat-sok, 3 ê lâng chiah ū êng-kang thang ûi tī hóe piⁿ chia̍h-àm. Àm-tǹg sī lo̍k-á bah kah pak-lāi khòng chhài-se ê thng, 3 ê lâng ná o-ló hó-chia̍h ná khai-káng, A-hōng mā ta̍uh-ta̍uh-á kā A-lông in kóng i phah lo̍k-á ê kang-hu sī án-chóaⁿ ē-hiáu--ê. Tang-sî-á sī A-hōng--ā in chng--ni̍h, ta̍k nî joa̍h--lâng sîn-bêng-seⁿ, to̍h ài ngiâ lāu-jia̍t, sîn-bêng ē jiáu-kéng pó-pì sù-hong sìn-tô͘, siau-chai kái-eh. Lâng-lâng ài pī-pān hó chiú hó chhài kèng-pài sîn-bêng. Mā m̄-chai sī tang-sî khai-sí, ū lâng kiàn-gī ài pān iá-kiû pí-sài, kóng sī beh hō͘ cheh-ji̍t koh khah lāu-jia̍t, che pí-sài ū hān-chè sī 15 kàu 17 hòe ê siàu-liân gín-á chiah ē-tàng chham-ka, to̍h sī ūi-tio̍h beh kó͘-lē gín-á-lâng hùn-liān thé-lêng, bóe--á, chng--ni̍h ta̍k ê chin jīn-tông, iá-kiû pí-sài piàn kah chiok sî-kiâⁿ, ke-ke-hō͘-hō͘ lóng chin jia̍t-chêng chham-ú, nā chhù--ni̍h ū kàu hòe ê gín-á, to̍h ē sàng in khì kiû-tūi liān kiû. Thâu-khí-seng lâng bô kàu, kan-na ē-tàng hun chò 2 tūi phah, bóe--á, jú lâi jú chē lâng lâi chham-ú, piàn-chò 8 tūi, pí-sài mā piàn-chò ài pí 3 kang, ta̍k tūi to siūⁿ beh piàⁿ thâu-miâ. “Kàu-liān khòaⁿ góa kiû khian liáu bē-bái, soán góa chò tâu-chhiú, 15 hòe hit nî, the̍h tio̍h tē 4 miâ, 16 the̍h tio̍h tē 3 miâ, kàu góa 17 hit nî, siūⁿ beh piàⁿ koan-kun, liān kiû liān kah bô-mê-bô-ji̍t, kiat-kó mā sī the̍h tio̍h tē 2 miâ niâ….” A-hōng teh kóng chit tōaⁿ óng-sū ê sî, ū-sî chhùi-chhiò-ba̍k-chhiò, ū-sî sàm-tām hi-bî, hoān-sè che to̍h sī chheng-chhun ê chu-bī.

3 ê lâng ná chia̍h ná phòe ōe, hi-hi-hōa-hōa, sim-chêng khin-sang, tú tio̍h--á to̍h ài chim-chiok hang bah-koaⁿ ê hóe, un-tō͘ ài ū-kàu koh bē-tàng siuⁿ iām. A-hōng kóng: “Lán lo̍k-kak mā ē-tàng chah--leh, kàu āu 1 ê chng-thâu ē-tàng the̍h khì bē, hoān-sè nā chhōe tio̍h kang-hu láu-tàu ê sai-hū, koh ē-tàng chhiáⁿ i khek hun-chhoe, khek 1 ki A-hōng ê lo̍k-kak hun-chhoe lâi pûn-hong.” Tán kàu ta̍k ê chia̍h-pá ke-si khoán hó-sè, to̍h chhun bah-koaⁿ ài koh kò͘, thèng-hāu bah-koaⁿ chhú-lí hó, sî-kan í-keng kài òaⁿ, 3 ê lâng chiah soah-kó͘ khì khùn.

Keh-tńg-kang 3 ê lâng kāng-khoán it-ti̍t sūn tōa-lō͘ kiâⁿ--lo̍h-khì, to̍h án-ne iû-koh kòe 3 ji̍t. Tē 4 kang kiâⁿ kàu beh-tàu-á, khai-sí phīⁿ tio̍h hái-hong kiâm-kiâm ê bī, 3 ê lâng chai-iáⁿ í-keng lī hái-piⁿ kài kīn, chim-chiok ka khòaⁿ, thâu-chêng mā khòaⁿ tio̍h to͘-chhī, èng-kai kha-pō͘ koh sió chhui--1-ē to̍h thang hó chhōe tio̍h kheh-tiàm hioh-khùn. Kiâⁿ--leh kiâⁿ--leh, bô-jōa-kú to̍h kiâⁿ kàu ūi. Khì kâng thàm-thiaⁿ liáu-āu, chai-iáⁿ chit ê to͘-chhī hō-chò Káng-to͘, chāi-tē ê lâng chú-iàu sī chhut-hái lia̍h-hî, bē hî, kiâⁿ-chûn chài-hòe chò chìn-chhut-kháu, koh ū kiâm-chúi-hòe ê tōa sió bē, chhī-lāi saⁿ kha-pō͘ chi̍t khám tiàm, kài chē keng tiàm lóng ū kha-siàu tī tiàm mn̂g-kháu teh hoah-siaⁿ kho͘ lâng-kheh, lâng-kheh nā óa--kòe, mā sûi ū kha-siàu kòe-lâi chih-chiap chio-ho͘, si̍t-chāi chin lāu-jia̍t.

3 ê lâng tē 1 piàn lâi-kàu Káng-to͘, tong-jiân mā sī chia khòaⁿ hia khòaⁿ, hāng-hāng hòⁿ-hiân, kiāⁿ-kiāⁿ sĭn-sián, in siūⁿ-siūⁿ--leh, kui-khì hó-hó-á ka koan-kong--1-ē, sńg ho͘ kàu-khùi chiah phah-sǹg, 3 ê lâng to̍h án-ne it-ti̍t se̍h, se̍h kah thiám--ah, chiah khai-sí kám-kak pak-tó͘-iau. A-hōng kóng: “Tú-chiah khòaⁿ--tio̍h ê hit keng hái-sán chhan-thiaⁿ lâng-kheh chhah-chhah-chhah, bô lán lâi-khì ka kau-koan--1-ē siáⁿ-khoán?” A-bêng chiⁿ kín-tiuⁿ, kóaⁿ-kín kóng: “Ài ē-kì-tit seng-mn̄g kè-siàu!” A-hōng ìn kóng: “Bián-kiaⁿ--lah, góa chhiáⁿ! Mài hoân-ló!” A-lông kah A-bêng koh siūⁿ tio̍h chìn-chêng tī A-hōng hia chò-kang tú siàu ê tāi-chì, sim-lāi pháiⁿ-sè pháiⁿ-sè, m̄-káⁿ ìn hó, khiā--leh bô tín-tāng, A-hōng koh chhui, 2 ê lâng chiah gī--leh gī--leh tòe A-hōng āu-piah kiâⁿ. Chhan-thiaⁿ chhut chhài kài kín, liāu-lí ê chhiú-lō͘ mā chin káng-kiù, bô-jōa-kú 3 ê lâng to̍h chia̍h kah pá-thong-thong, ū-iáⁿ sī liāu-lí hó-chia̍h, lâng-kheh chiah ē chē kah that-tó-ke! Chia̍h pá, A-hōng kóng: “Sî-kan mā òaⁿ--ah, lán sòa--lòe lâi chhōe kheh-tiàm kòe-mê, bîn-á-ji̍t khì káng-piⁿ chhōe khòaⁿ ū chûn thang chài lán khì Lâm-tó--bô.” 2 ê cha-po͘--ê lóng bô kî-thaⁿ ê ì-kiàn, tāi-chì to̍h chiàu án-ne kiâⁿ--lo̍h-khì.

Hoan-tńg-kang, 3 lâng khì kàu káng-piⁿ, chhah-chhah-chhah sì-kè lóng sī chûn, ū bō͘-e̍k chûn teh chiūⁿ hòe lo̍h hòe--ê, mā ū hî-chûn tng khò-hōaⁿ teh lo̍h hî hòe--ê, mā ū kheh-chûn tng teh kho͘ lâng-kheh beh chhut-káng--ê, kui ê káng-piⁿ bô-êng chhì-chhà, m̄-koh kóng--khí-lâi mā kài koài-kî, in 3 ê lâng kui ê káng-piⁿ ê chûn thâu-ke mn̄g thàu-thàu, to̍h sī bô chûn beh khì Lâm-tó. A-lông thó͘ 1 kháu tōa-khùi kóng: “Aih, nah ē án-ne, chhōe bô chûn sī ài án-chóaⁿ khì?” A-hōng ìn kóng: “Mài hoân-ló--lah, lán koh kâng thàm-thiaⁿ khòaⁿ-māi--leh, hoān-sè to̍h chhōe ū pō͘.” Chit sî 1 ê tī lō͘-piⁿ hioh-khùn nah-liâng chia̍h hun ê a-peh chhut-siaⁿ kā in hiu: “Siàu-liân--ê, lín kám sī beh khì Lâm-tó?” 3 ê lâng thiaⁿ--tio̍h chin hoaⁿ-hí, kín tōa-pō͘ kiâⁿ khì a-peh hia ka chhéng-kàu. A-peh kóng: “Thiaⁿ kóng Lâm-tó chòe-kīn ū tōa pháiⁿ-lâng, khah bē pêng-cheng, he chûn thâu-ke lóng bô ài khì, seng-lí-lâng gâu sǹg, kiaⁿ mō͘-hiám, nā bān-put-jī soe-siâu, ke-hóe to̍h ài pôe liáu-liáu, lín nā sī it-tēng ài khì, ē-tàng khì Sán-kâu hia kah i chham-siông khòaⁿ-māi--leh.” 3 ê lâng hoaⁿ-hí kah, chóng-sǹg sī ū hi-bāng, ū ki-hōe thang chhōe tio̍h chûn, kóaⁿ-kín mn̄g a-peh ài án-chóaⁿ khì Sán-kâu hia. A-peh kóng: “Khì Sán-kâu hia ê lō͘ oan-oan-oat-oat, góa kóng ū lō͘-lâi lín mā thiaⁿ bô lō͘-lâi--lah, kui-khì góa chhōa lín lâi-khì.”
--
Hosting provided by SoundOn