牛哥講經丨廣東話哲學、書籍分享

康德哲學係一座大山。威爾・杜蘭喺《哲學的故事》講到：「研究康德的哲學時，這世上我們最不願做的一件事，就是去讀康德自己的著作。我們的哲學家像又不像耶和華，彷彿是從雲端在對你講話，只是沒能配上耀眼閃電雷霆萬鈞的氣勢；他蔑視具體實例，他的說法是，因為它們會讓他的書中內容顯得過多。（在經過如此的壓縮之後，這麼精簡的一本書也包含了約莫八百頁的內容）」勞思光亦講過：「這本書｛純粹理性批判｝本身就是頭緒紛繁。許多論證重複得次數太多，另一些則常常匆匆說過。」即係有啲論證老是常出現，有啲論證好似無論證過咁。常人如你我，要閱讀康德原文會係非常痛苦。所以，我會同你用勞思光嘅《康德知識論要義》當中嘅「基源問題研究法」，去睇下康德喺《純粹理性批判》（簡稱一批）嘅藍圖，搵出貫穿康德嘅中心思想，從繁重文本當中理清一條道路。所謂簡明，我會用唔同比喻幫你理解康德；因為入門，我唔會亦唔可能解釋所有論證。我主要會將唔同部分嘅推論結果組合，話畀你聽，如果我哋接受唔同部分嘅推論結果，咁就會同康德一樣，可以為知識劃界。今集會分成四個部分：第一部分係「重智傳統」。講講西方主客問題嘅難關。第二部分係「難讀之書」。從字詞歧義、句子矛盾、康德長氣講下點解康德咁難睇。順便睇下康德對於「經驗」嘅兩層睇法。第三部分係「基源問題」。睇下勞思光點樣用基源問題一語道破康德核心思想，我哋都會睇下康德一批嘅結構，從結構分析康德嘅思想進路。第四部分係「康德要義」。我會用拼圖幫你理解康德點樣突破前人所製造出嚟嘅困局。分咁多個部分，係畀大家有多啲休息時間。_____Instagram： ⁠@cowgortalk⁠YouTube：⁠讀物農莊 Anybooks Farm⁠Patreon：⁠patreon.com/cowgortalk⁠【文稿可於Patreon免費閱讀】

秦始皇同漢高祖劉邦，你覺得佢哋差幾多歲？喺教科書入面，一個係滅六國嘅千古一帝，一個係滅秦建立漢朝嘅開國君主，感覺好似隔咗成個世代咁。但歷史學家李開元話你知：佢哋其實係同代人，只係差咗 3 歲！秦始皇生於公元前259年，漢高祖生於公元前 256 年；秦始皇死嗰陣五十歲（公元前 210 年），漢高祖死嗰陣六十二歲（公元前 195 年）。佢哋曾經喺同一個天空下生活咗四十七年。-從自然年齡嚟講，嬴政同劉邦係同一代人。-—「隔代」嘅印象，「是時代區分割裂人物，歷史觀念影響了歷史時間的結果。」所以，你唔好以為劉邦係一個秦國人，佢其實同秦始皇一樣，係一個確確實實嘅戰國人！當我哋打破咗這個「隔代」嘅錯覺，就會發現劉邦嘅故事，其實係一個47歲先開始人生事業嘅「戰國游俠」逆襲史。歡迎你返到嚟有文有路（19），【歷史癲過《尋秦記》（3）】，有文有路，文化方見道。今集，我哋會透過李開元嘅《秦崩》，由沛縣嘅風土人情講起，發現劉邦喺戰國末年，其實係一個鍾意讀書嘅模範少年，但結果，佢誤入歧途，成為父親口中嘅「無賴」，變成混跡江湖嘅「遊俠」……按：感謝youtube聽眾@keithngck 提醒。文中表示／／有趣嘅係，兩位都係「燕王」，成為一個歷史巧合。／／屬於筆誤，因為太子丹最終並無做到「燕王」。應該話，歷史巧合係，盧綰同太子丹都與「燕」相關。僅此致歉，多謝提醒。

－－每月一次牛言信箱－－本月主題：新生兩個建議方向：- 你相唔相信一個惡人會改邪歸正？- 喺邊一次體驗中，你最感受到新生嘅感覺？本月參考文本／戲劇：《不良一族尋愛記》主題只係提議，你可以按呢個題目投稿，亦可以按自己心中所定嘅題目書寫。期望見到你嘅作品！

你應該有聽過漢高祖劉邦係「真龍天子」嘅傳說，話佢阿媽夢見同條龍交配先至生咗佢。-「其先劉媼嘗息大澤之陂，夢與神遇。是時雷電晦冥，太公往視，則見蛟龍於其上。已而有身，遂產高祖。」呢個故仔聽落好似好荒謬？一個咁荒謬嘅故事，點解會出現喺尊重事實、鍾意做田野調查嘅歷史學家——司馬遷嘅《史記》之上呢？歷史學家李開元話你知，司馬遷寫呢段神話嗰陣，其實係話中有話。若然我哋剝開神話嘅外衣，還原戰國末年沛縣那種豪放嘅民風，你會發現「真龍天子」可能唔係神蹟，而係一場發生喺濃霧中嘅「野合」。亦即係話，司馬遷想暗示一個無人夠膽明講嘅秘密——劉邦可能係一個私生子。歡迎你返到嚟有文有路（18），【歷史癲過《尋秦記》（2）】，有文有路，文化方見道。今集，我哋跟隨李開元嘅腳步，重返劉邦嘅出生地，由一塊喺沛縣出土嘅古老石碑講起，重新審視這位開國皇帝充滿疑點嘅身世之謎，揭開「龍霧橋」背後嗰段關於「野合」與「造神」嘅千古謎團。

你有無聽過漢朝有一個侯爵，個名叫做「羹頡侯」？翻譯成現代廣東話，即係「飯菜刮鑊侯」。堂堂漢朝開國皇帝劉邦，點解要畀個咁肉酸嘅封號自己親侄仔？原來呢一切，都源於當年一餐飯嘅恩怨。如果要講漢高祖劉邦嘅發家史，除咗有張良、韓信呢啲大人物，其實佢身邊仲有一班性格鮮明嘅屋企人。面對曾經睇唔起佢嘅大嫂、老實過頭嘅二哥，同埋滿腹墨水嘅細佬，劉邦嘅態度可以話係愛恨分明。歡迎你返到嚟有文有路（17），【歷史癲過《尋秦記》（1）】。今集，我哋會藉由日本就實大學人文科學部教授李開元所寫嘅《秦崩》，了解劉邦嘅原生家庭，睇下呢位平民皇帝發跡之後，點樣用最市井、最記仇，但又最真實嘅方式，去處理佢嗰本難唸嘅家庭經——係「一人得道，雞犬升天」，定係「君子報仇，十年未晚」呢？依家，我哋就要將劉邦還原返做「劉季」先。